नाशिक – नाशिक पोलीस गुन्हेगारांकडून ‘नाशिक जिल्हा-कायद्याचा बालेकिल्ला’ असे वदवून घेत असतांना अजूनही दहशत पसरविण्याचे प्रकार सुरू आहेत. शरणपूर रोडवरील बेथेल नगराजवळील तिबेटियन मार्केट परिसरात सराईतांनी हवेत केलेला गोळीबार आणि तोडफोड सराईत गुन्हेगार हर्षद पाटणकरचा काटा काढण्यासाठी करण्यात आल्याचे उघड झाले आहे.
विशेष म्हणजे हा प्रकार घडलेल्या ठिकाणापासून हाकेच्या अंतरावर जुने पोलीस आयुक्तालय असून तेथे पोलिसांचे विविध विभाग कार्यरत आहेत. याबाबत सरकारवाडा पोलीस ठाण्यात गुन्हा दाखल असून सहा जणांना १० नोव्हेंबरपर्यंत पोलीस कोठडी सुनावण्यात आली आहे.
सोमवारी रात्री साडेआठ वाजण्याच्या सुमारास शरणपूर रोड येथे भूषण पवार, रोशन शिंदे, ओम जगताप, प्रेम जगताप, अजय देवरे, विकी गुंजाळ आणि इतर सात ते आठ जण एकत्र आले. त्यांनी हातात कोयते, चॉपर, दांडके घेत गल्लीत उभ्या असलेल्या रिक्षा, दुचाकी, चारचाकी वाहनांच्या काचा फोडल्या. परिसरातील नागरिकांच्या घरांवर काचेच्या बाटल्या फेकत गल्लीतील लोकांना शिवीगाळ केली.
रिक्षाचालक मायकल भंडारी (५१) यांनी त्यांना विरोध करण्याचा प्रयत्न केला असता त्यांच्यावर कोयता उगारत जीवे मारण्याची धमकी दिली. हा धुडगुस सुरू असतांना दोन रिक्षा, एक दुचाकीची काच फोडली. केवळ दहशत पसरविण्याच्या हेतुने सराईतांनी हे कृत्य करीत पोलिसांना एक प्रकारे आव्हान दिल्याचे मानले जात आहे.
काही दिवसांपूर्वी पंचवटी परिसरात अवैधरित्या सुरू असलेल्या हातगाड्या, खाद्यपदार्थांचे ठेले विक्रेत्यांवर कारवाई करत त्या ठिकाणी वावर असणाऱ्या सराईतांचा बंदोबस्त करण्यात आला होता. तिबेटियन मार्केट परिसरातील खाऊ गल्ली कायम चर्चेत असते. महापालिका आणि पोलीस विभागाकडून याठिकाणी आवश्यक ती कारवाई व्हावी, अशी मागणी परिसरातील नागरिकांनी केली आहे.
दरम्यान, या घटनेची माहिती सरकारवाडा पोलिसांना मिळताच त्यांनी घटनास्थळी धाव घेतली. संशयितांची ओळख पटवत काही तासात सातहून अधिक जणांच्या मुसक्या आवळल्या. पूर्ववैमनस्यातून एका टोळीने गुन्हेगार हर्षद पाटणकर याला मारण्याच्या उद्देशाने बेथेलनगरात जात उच्छाद मांडला. पाटणकर हा काही महिन्यांपासून विविध गुन्ह्यांत पसार असून तो बेथेलनगर मध्ये आल्याची माहिती टोळक्याला मिळाली असता त्यांनी हवेत गोळीबार केला. परंतु पाटणकर तेथे नसल्याने वाहने फोडण्यात आली.
दरम्यान, गुन्हेगारांच्या शोधासाठी अंबड गुन्हे शोध पथक, गस्ती पथक, गुन्हे शाखा एक पथक, गुंडा पथकाने सहा जणांना ताब्यात घेतले. त्यांना न्यायालयात हजर केले असता १० नोव्हेंबरपर्यंत पोलीस कोठडी देण्यात आली. अजय देवरे (२१), भारत कुऱ्हाडे (१९), विकी गुंजाळ (१८), प्रेम जगताप (१९), मोहित जगताप उर्फ ओम (२०, सर्व रा. गंगापूर गाव) याच्यासह एका विधीसंघर्षित बालकाला ताब्यात घेण्यात आले आहे.
हर्षद पाटणकर आणि राहुल पवार यांच्यातील पूर्ववैमनस्यातून हा प्रकार झाला असून गुन्ह्यातील अनोळखी संशयितांची नावे निष्पन्न करण्यात आली आहेत. या घटनेत भूषण पवार हा जखमी असून त्याच्या तक्रारीवरून पाटणकर व त्याच्या पाच सहा साथीदाराविरूध्द सरकारवाडा पोलीस ठाण्यात गुन्हा दाखल करण्यात आला आहे.