जळगाव : राष्ट्रवादीचे (शरद पवार) ज्येष्ठ नेते आमदार एकनाथ खडसे यांच्या जळगावमधील बंगल्यातून सोने-चांदीसह रोख रकमेची चोरी झाल्याची घटना मंगळवारी उघडकीस आली. दरम्यान, चोरट्यांनी सोने-चांदीसोबत खडसेंच्या काही महत्वाच्या सीडीही सोबत नेल्या आहेत. त्या संदर्भात माहिती स्वतः खडसे यांनी बुधवारी दुपारी पत्रकारांना दिली.
जळगाव शहरातील मू. जे. महाविद्यालयाच्या परिसरात शिवराम नगरात खडसे कुटुंबियांचा बंगला आहे. संपूर्ण खडसे कुटुंबीय कोथळी (ता. मुक्ताईनगर) येथे वास्तव्यास असते. त्यामुळे जळगावमधील त्यांच्या बंगल्यात फारसा कोणाचा वावर नसतो. देखभालीसाठी एका व्यक्तीची नेमणूक केली आहे. ती व्यक्ती सोमवारी रात्री नऊच्या सुमारास बंगल्याची सर्व दारे कुलुपबंद करून गेल्यानंतर चोरट्यांनी आवारातील लोखंडी दरवाजासह मुख्य दरवाजाचे कुलूप तोडून खडसे यांच्यासह त्यांच्या सून केंद्रीय राज्यमंत्री रक्षा खडसे यांच्या खोल्यांमधील सामान अस्ताव्यस्त फेकून सुमारे ६८ ग्रॅम सोने, साडेसात किलो चांदी आणि ३५ हजार रुपये रोख रकमेची चोरी केली.
मंगळवारी सकाळी देखभालीची जबाबदारी असलेली व्यक्ती बंगल्याजवळ आल्यानंतर चोरी झाल्याचे लक्षात आले. त्याने खडसे कुटुंबियांना त्याविषयी तत्काळ माहिती दिली. त्यानंतर रामानंदनगर पोलीस ठाण्याचे पथक घटनास्थळी दाखल झाले. चोरट्यांनी शांततेत सर्व कुलपे तोडली आहेत.निवांतपणे सर्व खोल्या तपासलेल्या दिसत आहेत, असे एकनाथ खडसे यांनी पत्रकारांना सांगितले. मुक्ताई बंगल्याचे सीसीटीव्ही चित्रण उपलब्ध झाले नसले, तरी आजुबाजुच्या घरांवरील सीसीटीव्हीचे चित्रण पाहून पुढील तपासाला गती दिल्याची माहिती उपविभागीय पोलीस अधिकारी नितीन गणापुरे यांनी दिली.
दरम्यान, एकनाथ खडसे यांनी चोरीच्या घटनेनंतर बंगल्यातील कपाटांमधून आणखी काही सामान चोरीस गेला आहे का म्हणून बारकाईने पाहणी केली. तेव्हा त्यांना कपाटातून काही महत्वाच्या सीडी गायब झाल्याचे दिसून आले. त्या विषयी त्यांनी पत्रकारांना माहिती दिली. चोरट्यांनी चोरून नेलेल्या सीडी फार महत्वाच्या नसल्या तरी कामाच्या होत्या, असे ते म्हणाले. सोने, चांदी आणि पैशांसोबत सीडी चोरून नेण्यामागे कोणाचा हात आहे का, तुम्हाला कोणावर संशय आहे का, असे प्रश्न त्यांना पत्रकारांनी विचारले. तेव्हा माझ्याजवळ पुरावे आहेत आणि ते आपण पोलिसांना स्वतःहून देणार आहोत, असे खळबळजनक स्पष्टीकरण त्यांनी केले.
काही महिन्यांपूर्वी हनी ट्रॅप प्रकरणातील संशयित प्रफुल्ल लोढा यास अटक झाल्यानंतर एक कथित सीडी चांगलीच चर्चेत आली होती. लोढाकडे असलेली ती सीडी शोधण्यासाठीच त्याच्यावर कारवाई केल्याचा आरोप एकनाथ खडसे यांनी त्यावेळी केला होता. त्या सीडीमुळे मंत्री गिरीश महाजन यांची राजकीय कारकीर्द धुळीला मिळविण्याची भाषा करणाऱ्या लोढाची जुनी चित्रफीतही खडसे यांनी बाहेर आणली होती. जिल्ह्याचे राजकारण ढवळून काढणाऱ्या त्या सीडीचे गूढ त्यामुळे आणखी जास्त वाढले होते. मंत्री महाजन यांच्याशी संबंधित माहिती असलेली सीडी अजूनही लोढा याच्याकडेच आहे. त्यासाठीच पोलीस लोढाच्या विरोधात वारंवार कारवाई करत असल्याचा आरोप देखील खडसे यांनी केला होता. या पार्श्वभूमीवर, खडसेंच्या बंगल्यावरील सीडी चोरीला गेल्यानंतर अनेकांच्या भुवया उंचावल्या. चोरीला गेलेल्या सीडी नेमक्या कोणत्या होत्या, असाही प्रश्न उपस्थित झाला. मात्र, खडसेंनी चोरीला गेलेल्या सीडी त्या नव्हत्या, असे सांगितले.