जळगाव : मध्यप्रदेशातून मुक्ताईनगरकडे चोरट्या मार्गाने अवैध विक्रीसाठी आणला जात असलेला सुमारे ७७ लाख रुपयांचा गुटखा बुधवारी जप्त करण्यात आला. ही कारवाई अन्न व औषध प्रशासनाच्या मदतीने स्थानिक गुन्हे शाखा आणि मुक्ताईनगर पोलिसांनी यशस्वी केली.
स्थानिक गुन्हे शाखेचे वरिष्ठ निरीक्षक राहुल गायकवाड यांना गुप्त माहितीच्या आधारे मध्य प्रदेशातून जळगाव जिल्ह्यात अवैध गुटखा येत असल्याची माहिती मिळाली होती. त्यानुसार, त्यांनी तातडीने मुक्ताईनगर पोलिसांना सतर्क केले. मध्य प्रदेश आणि महाराष्ट्र सीमेवरील पुरनाड फाटा परिसरात पोलिसांकडून लगेच नाकाबंदी करण्यात आली. यावेळी संशयित भरधाव वेगात मालवाहू वाहन घेऊन जाताना दिसून आला. त्यास पोलिसांनी थांबण्याचा इशारा दिला असता चालकाने वाहन न थांबवता पळून जाण्याचा प्रयत्न केला. अखेर सारोळा फाट्याजवळ पोलिसांनी त्यास गाठून ताब्यात घेतले.
मालवाहू वाहनाची झडती घेतल्यावर पोलिसांना आतमध्ये पोतडीत भरलेला सुमारे ७७ लाख रूपयांचा गुटखा आढळला. कारवाईत पोलिसांनी २५ लाखांचे मालवाहू वाहन आणि १२ हजारांचा भ्रमणध्वनी, असा एकूण एक कोटी दोन लाख ३३ हजार ४६० रुपयांचा मुद्देमाल जप्त केला. या कारवाईत मालवाहू वाहनाचा चालक आशिष जयस्वाल (रा. देवास, मध्यप्रदेश) याला अटक करण्यात आली. तसेच वाहन मालक आशिक खान (रा. नागपूर) याच्या विरोधातही गुन्हा दाखल करण्यात आला. महाराष्ट्रात गुटखा निर्मिती, साठवणूक आणि वाहतूक यावर बंदी लागू केली आहे. या आदेशाचे उल्लंघन केल्यामुळे संशयितांच्या विरोधात कायदेशीर कारवाई करण्यात येणार आहे.
पोलीस अधीक्षक डॉ. महेश्वर रेड्डी यांच्या मार्गदर्शनाखाली स्थानिक गुन्हे शाखेचे वरीष्ठ पोलीस निरीक्षक राहुल गायकवाड, मुक्ताईनगर पोलीस ठाण्याचे निरीक्षक आशिष अडसूळ, उपनिरीक्षक जयेश पाटील, सोपान गोरे तसेच सलीम तडवी, छगन तायडे, रतन गीते, मयूर निकम, भरत पाटील, देश पाटील, भाऊराव घेते, राकेश धनगर आणि संदीप धनगर यांनी ही कारवाई यशस्वी केली.
जळगाव जिल्ह्यात तंबाखू, गुटखा विक्री बंदी नावालाच दिसून येत आहे. शहरांसोबत गावागावांत खुलेआम पान टपऱ्यांवर तंबाखू आणि गुटख्याची विक्री होत आहे. एवढेच नव्हे तर शाळा, महाविद्यालयांच्या परिसरातही विशेषतः गुटखा विक्री सुरू असल्याचे दिसून येत आहे. त्यामुळे पोलीस प्रशासन त्या विरोधात धडक मोहीम राबविणार आहे काय, असा प्रश्न नागरिकांमधून उपस्थित होत आहे. आंतरराज्यीय सीमांवर तपासणी नाके असताना देखील गुटखा महाराष्ट्रात विक्रीसाठी येत असल्याने सखेद आश्चर्य व्यक्त होत आहे.