नाशिक : पंचवटीतील फुलेनगरात सराईतांच्या टोळीने मागील भांडणाची कुरापत काढत दगडफेक आणि हवेत गोळीबार केला. या प्रकारामुळे पंचवटीतील वाढती गुन्हेगारी पुन्हा चर्चेत आली आहे. शहर परिसरातील वाढती गुन्हेगारी हा नाशिककरांसह पोलीस प्रशासनासमोरील आव्हानात्मक विषय ठरु पाहत आहे. पोलीस वेगवेगळ्या कारवाईतून गुन्हेगारीवर नियंत्रण आणण्याचा प्रयत्न करीत असले तरी समाजकंटकांकडून सातत्याने पोलिसांना आव्हान देण्यात येत आहे.
बुधवारी पंचवटीतील फुलेनगरात सराईत गुन्हेगारांच्या टोळक्याने जुन्या भांडणाची कुरापत काढत दगडफेक आणि गोळीबार केला. सुमित महाले ( २१, रा. फुले नगर) यांनी याविषयी तक्रार दिली. संशयित विकी वाघ, ऋषिबाबा परसे, जय संतोष खरात, जय मोरे ऊर्फ टिंगरी, तुंड्या दादू आणि इतर चार ते पाच जणांचे टोळके बुधवारी मध्यरात्री विजय नगरात जमले होते.
शेषराव महाराज चौकातील सैलानी बाबा नगरच्या कमानीपासून सर्व हल्लेखोर आरडाओरडा करीत महाले यांच्या घराबाहेर जमा झाले. आरडाओरडमुळे महाले घराबाहेर आले असता मागील भांडणाचा वाद उकरून काढत संशयितांनी महाले कुटुंबियांना शिवीगाळ सुरु केली. या प्रकाराला महाले यांनी विरोध करण्याचा प्रयत्न केला असता त्यांच्या घरावर दगडफेक करण्यात आली. बंदुकीतून हवेत गोळीबार करुन संशयित पसार झाले.
दरम्यान, पंचवटी पोलीस ठाण्यात याविषयी तक्रार दाखल करण्यात आली असून १० ते १२ संशयितांविरुध्द गुन्हा दाखल करण्यात आला आहे. पोलिसांनी संशयितांच्या शोधासाठी पथके तयार केली असून काहींना ताब्यात घेण्यात आले आहे.
पंचवटी परिसर गुन्हेगारी कारवायांमुळे कायमच संवेदनशील राहिला आहे. या ठिकाणी कृषी उत्पन्न बाजार समिती, काही शासकीय कार्यालये आहेत. पंचवटीतील वेगवेगळ्या भागात अवैध धंदे, दारू अड्डेचालकांची दहशत आहे. त्यामुळे त्यांच्याविरोधात सहसा कोणी तक्रार देण्यासाठी पुढे येत नाही. त्यामुळे परिसरात गुन्हेगारीचा आलेख वाढतच आहे. समाजकंटकाडून सातत्याने नागरिकांना दहशतीखाली ठेवण्याचा प्रयत्न होताे. लुटमार, हत्या, जबरी चोरी, वाहनांची तोडफोड प्रकार सातत्याने होत असल्याने पोलिसांनी कठोर कारवाई करण्याची गरज व्यक्त होत आहे.