पनवेल : लग्नाचे आमिष दाखवून कामोठे येथील ४० वर्षीय महिलेची तब्बल १६ लाख रुपयांची फसवणूक केल्याचा धक्कादायक प्रकार उघडकीस आला आहे. या प्रकरणी कामोठे पोलीस ठाण्यात बुधवारी फसवणूकीचा गुन्हा दाखल करण्यात आला आहे. पोलिसांच्या माहितीनुसार,कामोठे येथील सेक्टर १९ मध्ये राहणा-या पीडित महिलेने २०१८ मध्ये एका मॅट्रिमोनियल कंपनीच्या संकेतस्थळावर त्यांची वैयक्तिक माहिती संकलित केली होती. याच संकेतस्थळावर ४० वर्षीय निलेश निफाडे पाटील याची पीडितेसोबत ओळख झाली. निलेश हा नाशिक जिल्ह्यातील निफाड तालुक्यातील शिरवाडे वणी या गावात राहणार आहे.
निलेशने स्वताला ओळख करताना व्यावसायिक असल्याचे सांगून महिलेचा विश्वास संपादन केला. त्यानंतर त्याने लग्नाचे आश्वासन देत जून २०१८ ते जून २०२२ या काळात पुणे रेल्वे स्टेशन परिसरात वारंवार भेटी घेतल्या. त्यादरम्यान त्याने “व्यवसायातील गुंतवणुकीसाठी पैसे लागतील” असे सांगून वेळोवेळी १६ लाख रुपये पीडितेकडून घेतले. मात्र, पैसे पुन्हा कधी मिळतील अशी पीडितेने विचारणा केल्यावर “आज देतो, उद्या देतो” असे सांगून तो टाळाटाळ करत होता. अखेर अनेक महिन्यांचा अनुभवानंतर पीडितेला त्यांची फसवणूक झाल्याचे स्पष्ट झाले.
या प्रकरणी पीडित महिलेच्या तक्रारीवरून सहाय्यक पोलीस निरीक्षक राकेश पगारे यांनी बुधवारी गुन्हा दाखल केला असून तपास सहाय्यक पोलीस निरीक्षक प्रियांका खरटमल करत आहेत. प्राथमिक चौकशीत गुन्ह्याची सुरूवात पुणे रेल्वे स्टेशन परिसरात झाल्याचे निष्पन्न झाल्याने हा गुन्हा पुढील तपासासाठी पुणे येथील बंडगार्डन पोलीस ठाण्यात वर्ग करण्यात आल्याची माहिती कामोठे पोलीस ठाण्याच्या वरिष्ठ पोलीस निरीक्षक विमल बिडवे यांनी दिली.