नवी मुंबई : नवी मुंबई पोलीस दलात नवीन उमेदवारांना संधी मिळणार आहे. पोलीस आयुक्त कार्यालयाने २०२४-२०२५ या वर्षासाठी ५२७ विविध पदांसाठी पोलीस भरती प्रक्रिया सुरू केल्याची अधिकृत माहिती दिली आहे. या भरतीमध्ये पोलीस शिपाई, चालक पोलीस शिपाई आणि बॅण्डस्मन अशा विविध पदांचा समावेश आहे.
नवी मुंबई पोलीस दलात ४५०० हजार पोलीस कर्मचारी आणि ३५० अधिकारी कार्यरत आहेत. नवी मुंबई आंतरराष्ट्रीय विमानतळामुळे स्वतंत्र विमानतळ पोलीस ठाणे आणि उलवा पोलीस ठाण्यांच्या निर्मितीनंतर अजूनही तीन पोलीस ठाण्यांचा विस्तार नवी मुंबई पोलीस दलाच्या कार्यकक्षेत होणार आहे. पोलीस आय़ुक्त मिलिंद भारंबे यांनी तीन पोलीस परिमंडळाची रचना केल्यानंतर वाढत्या लोकसंख्येमुळे पोलीस बळ सुद्धा वाढवावे लागणार असल्याने ५२७ पदांच्या भरतीमुळे पोलिसांच्या सूरक्षेचे कडे अजून मजबूत होईल.
नवी मुंबई पोलीस दलाने जाहीर केलेल्या भरती प्रक्रियेनुसार, पोलीस शिपाईच्या ४३९ जागा, चालक पोलीस शिपाईच्या ८२ जागा, तसेच बॅण्डस्मनच्या ६ जागा उपलब्ध आहेत. या पदांसाठी पात्र उमेदवारांचे ऑनलाईन अर्ज ३० नोव्हेंबरपर्यंत स्वीकारले जाणार आहेत.
भरती प्रक्रियेविषयी सर्व सविस्तर माहिती policerecruitment2025.mahait.org तसेच http://www.mahapolice.gov.in या अधिकृत संकेतस्थळांवर प्रसिद्ध करण्यात आली आहे. इच्छुक उमेदवारांना ऑनलाइन पद्धतीनेच अर्ज सादर करावा लागणार आहे. अर्ज सादर करण्याची संपूर्ण प्रक्रिया, आवश्यक पात्रता निकष, शारीरिक चाचणी, लेखी परीक्षा आणि इतर मार्गदर्शक सूचना संबंधित संकेतस्थळावर उपलब्ध आहेत.
ही भरती प्रक्रिया पोलीस सह आयुक्त संजय येनपुरे यांच्या अध्यक्षतेखाली पार पाडली जाणार आहे. भरती प्रक्रियेद्वारे नवी मुंबई पोलीस दलाला ताज्या आणि प्रशिक्षित मनुष्यबळाची साथ मिळणार असून, शहराच्या सुरक्षाव्यवस्थेत अधिक मजबुती येण्यास मदत होईल, अशी अपेक्षा व्यक्त करण्यात येत आहे.
नवी मुंबईतील तरुणांसाठी ही भरती एक सुवर्णसंधी ठरणार असून, इच्छुक उमेदवारांनी निर्धारित वेळेत अर्ज सादर करण्याचे आवाहन पोलीस विभागाकडून करण्यात आले आहे.