Cannes Film Festival : दीपिकाच्या रेट्रो लूकने वेधलं लक्ष; ‘मस्तानी’च्या रेड कार्पेटवरील साडीतील लूकची सोशल मीडियावर चर्चा

सध्या सगळीकडे कान्स चित्रपट महोत्सवाची जोरदार चर्चा सुरू आहे. भारताला या चित्रपट महोत्सवामध्ये पहिल्यांदाच ‘कंट्री ऑफ ऑनर’चा सन्मान मिळाला आहे. ( फोटो : अनुराग ठाकूर/ ट्विटर) आंतरराष्ट्रीय स्तरावर मानाचा मानल्या जाणाऱ्या ७५व्या कान्स चित्रपट महोत्सवाला १७ मे पासून सुरुवात झाली आहे. या चित्रपट महोत्सवात बॉलिवूड अभिनेत्री दीपिका पदुकोण ज्युरी म्हणून काम पाहत आहे. कान्स चित्रपट महोत्सवातील दीपिकाच्या लूकने सगळ्यांचं लक्ष वेधून घेतलं आहे. चित्रपट महोत्सवाच्या पहिल्या दिवशी दीपिका हिरव्या रंगाची पॅण्ट आणि प्रिंटेड शर्टमध्ये दिसून आली. यावर तिने खड्यांचा नेकलेस परिधान केला होता. दीपिकाचा हा हटके लूक सोशल मीडियावर व्हायरल झाला आहे. कान्स चित्रपट महोत्सवात आज दीपिका साडीत दिसून आली. दीपिकाने परिधान केलेली साडी खास सब्यसाची ब्रॅण्डने डिजाइन केली आहे. काळ्या रंगाची शिमरी साडी परिधान करत दीपिकाने रेट्रो लूक केला होता. बन हेअरस्टाइल आणि डोळ्यांच्या मेकअपने दीपिकाने सगळ्याचंच लक्ष वेधून घेतलं. बॉलिवूडच्या मस्तानीच्या रेड कार्पेचवरील या रेट्रो लूकवर चाहत्यांच्या नजरा खिळल्या होत्या. दीपिकाचा हा रेट्रो लूक सोशल मीडियावर व्हायरल होत असून या लूकचं सर्वत्र कौतुक होताना दिसतेय. (सर्व फोटो : दीपिका पदुकोण, फेस्टिवल दे कान्स/ इन्स्टाग्राम)