Photos : ‘भूल भूलैय्या २’ चित्रपटाचा बॉक्स ऑफिसवर बोलबाला; कार्तिकने घेतलेल्या मानधनाचा आकडा पाहून थक्क व्हाल

हॉरर कॉमेडी असलेला 'भूल भूलैय्या २' हा चित्रपट बाॅक्स ऑफिसवर धुमाकूळ घालतोय. २० मेला प्रदर्शित झालेल्या या चित्रपटाने पहिल्याच दिवशी तब्बल १४ कोटी रुपयांपेक्षा अधिक कमाई केली. सध्या बाॅक्स ऑफिसवर याच चित्रपटाचा बोलबाला आहे. 'भूल भूलैय्या' या चित्रपटाचा हा सिक्वेल आहे. 'भूल भूलैय्या'मध्ये अभिनेता अक्षय कुमार आणि अभिनेत्री विद्या बालन यांच्या भूमिका होत्या. 'भूल भुलैय्या २' चित्रपटात बाॅलिवूड अभिनेता कार्तिक आर्यन आणि अभिनेत्री कियारा अडवाणी मुख्य भूमिकेत आहेत. कार्तिक आणि कियाराला पाहण्यासाठी प्रेक्षक चित्रपटगृहात गर्दी करताना दिसत आहेत. 'भूल भूलैय्या' चित्रपटाप्रमाणेच हा चित्रपटदेखील प्रेक्षकांचे मनोरंजन करताना दिसत आहे. चित्रपटात बाॅलिवूड अभिनेत्री तब्बूने 'अंजुलिका' ही भूमिका साकारली आहे. ही भूमिका साकारण्यासाठी तब्बूने २ कोटी रुपये मानधन घेतले असल्याची माहिती आहे. अभिनेता राजपाल यादव विनोदी भूमिका साकारण्यासाठी ओळखला जातो. 'भूल भूलैय्या' चित्रपटात त्याने पंडितची भूमिका साकारून प्रेक्षकांचं मनोरंजन केलं होतं. 'भूल भूलैय्या २' मध्येदेखील राजपाल यादव 'छोटे पंडित' या विनोदी भूमिकेत आहे. ही भूमिका साकारण्यासाठी राजपालने १.२५ कोटी रुपये मानधन घेतले आहे. अभिनेता संजय मिश्रांनी चित्रपटात 'बडे पंडित' ही भूमिका साकारली आहे. या चित्रपटासाठी त्यांनी ८० लाख रुपये मानधन घेतल्याची माहिती आहे. चित्रपटात मुख्य भूमिकेत असलेल्या कियारा अडवाणीने ४ कोटी रुपये मानधन घेतले आहे. या चित्रपटात कियाराने 'रीत ठाकूर' ही भूमिका साकारली आहे. अभिनयाची छाप पाडून बाॅलिवूडमध्ये स्वत:ची अशी वेगळी ओळख निर्माण करणारा अभिनेता कार्तिक आर्यन 'भूल भूलैय्या २' चित्रपटात मुख्य भूमिकेत आहे. 'भूल भूलैय्या २'मध्ये कार्तिक 'डॉ.नील' च्या भूमिकेत आहे. मीडिया रिपोर्टनुसार, कार्तिकने चित्रपटासाठी १५ कोटी रुपये मानधन घेतले आहे. (सर्व फोटो : इंडियन एक्सप्रेस)