Photos : ‘आई कुठे काय करते’ मधील यशच्या बहिणीची ‘बिग बॉस मराठी’च्या घरात एन्ट्री, जाणून घ्या तिच्याबद्दल

बहुप्रतिक्षीत ‘बिग बॉस मराठी’चं चौथं पर्व प्रेक्षकांच्या भेटीला आलं आहे. छोट्या पडद्यावरून घराघरात पोहोचलेली अभिनेत्री अमृता देशमुख यंदाच्या पर्वात सहभागी झाली आहे. ‘आई कुठे काय करते’ मालिकेत यशची भूमिका साकारणारा अभिनेता अभिषेक देशमुखशी अमृताचं खास नातं आहे. अमृता आणि अभिषेक सख्खे भाऊ-बहीण आहेत. झी युवा वाहिनीवरील ‘फ्रेशर्स’ मालिकेतून अमृताला प्रसिद्धी मिळाली. या मालिकेत तिने साकारलेली भूमिका प्रेक्षकांच्या पसंतीस उतरली. ‘तुमचं आमचं सेम असतं’, ‘मी तुझीच रे’ या मालिकांतून अमृताने अभिनयाची छाप प्रेक्षकांच्या मनावर पाडली. मालिकांबरोबरच अमृता रुपेरी पडद्यावरही झळकली आहे. ‘स्वीटी सातारकर’ या चित्रपटात तिने प्रमुख भूमिका साकारली होती. अमृता अभिनयाप्रमाणेच तिच्या आवाजासाठीही ओळखली जाते. ती रेडिओ जॉकीही आहे. अमृता सोशल मीडियावर सक्रिय असून ती चाहत्यांच्या संपर्कात राहण्याचा प्रयत्न करते. तिचे इन्स्टाग्रामवर ३ लाखांहून अधिक फॉलोवर्स आहेत. अनेकदा अमृता तिचे ग्लॅमरस फोटो सोशल मीडियावर शेअर करत असते. ‘बिग बॉस’च्या घरात अमृताला पाहिल्यावर तिच्या चाहत्यांनाही आनंद झाला आहे. अमृता ‘बिग बॉस’च्या घरात १०० दिवस टिकून राहण्यासाठी कोणत्या युक्त्या वापरणार, हे पाहण्यासाठी चाहतेही उत्सुक आहेत. ‘बिग बॉस मराठी’च्या चौथ्या पर्वाची ट्रॉफी अमृता घेऊन येणार का?, हे पाहणं औत्सुक्याचं ठरणार आहे. (सर्व फोटो : अमृता देशमुख/ इन्स्टाग्राम) (हेही पाहा>> Inside Photos : आलिशान हॉल, गॉसिप करण्यासाठी खास कट्टा अन्…; चाळ संस्कृतीची थीम असलेलं ‘बिग बॉस मराठी’चं घर पाहिलंत का?)