Oscar Awards 2023: ऑस्कर स्वीकारण्यासाठी मंचावर साडी नेसून पोहोचलेल्या गुनीत मोंगा कोण आहेत?

भारताला यंदाच्या ऑस्करमध्ये दोन पुरस्कार मिळाले. 'नाटू नाटू' व 'द एलिफंट व्हिस्परर्स' यासाठी भारताने ऑस्कर जिंकले. ‘द एलिफंट व्हिस्परर्स’ला बेस्ट डॉक्युमेंटरी शॉर्ट फिल्मचा ऑस्कर पुरस्कार मिळाला आहे. ‘द एलिफंट व्हिस्परर्स’ ही नेटफ्लिक्स डॉक्युमेंटरी आहे. त्यात सोडून दिलेला हत्ती आणि त्याची काळजी घेणारी व्यक्ती यांच्यातील अतूट बंधन दाखवण्यात आले आहे. या लघुपटाच्या निर्मात्या गुनीत मोंगा आहेत. गुनीत मोंगा साडी नेसून मंचावर ऑस्कर पुरस्कार घेण्यासाठी गेल्याने त्यांची चांगलीच चर्चा होत आहे. त्यांच्याबरोबर दिग्दर्शिका कार्तिकी गोन्साल्विस देखील होत्या. गुनीत मोंगा या चित्रपट निर्मात्या आणि दिग्दर्शक आहेत. त्यांनी आतापर्यंत 'पगलैट', 'द लंचबॉक्स' आणि ऑस्कर विजेता शॉर्ट डॉक्यूमेंटरी 'पीरियड अँड ऑफ सेंटेंस'ची निर्मिती केली आहे. ३९ वर्षांच्या गुनीत मोंगा या सिख्या एंटरटेनमेंटच्या संस्थापक व सीईओ आहेत. गुनीत यांनी डिसेंबर २०२२ मध्ये सनी कपूरशी लग्न केलं. दोघांची भेट एका डेटिंग अॅपवर झाली होती. 'गँग्स ऑफ वासेपूर', 'मसान' यासारख्या चित्रपटांची निर्मिती गुनीत यांच्या कंपनीने केली आहे. “आम्ही आत्ताच भारतीय प्रॉडक्शनसाठी पहिला ऑस्कर जिंकला! दोन महिलांनी हे करून दाखवलंय! मी अजूनही थरथरत आहे,” असं गुनीत मोंगा यांनी ऑस्कर जिंकल्यानंतर केलेल्या ट्वीटमध्ये म्हटलं आहे. (सर्व फोटो - गुनीत यांचे इन्स्टाग्राम व संग्रहित)