‘प्रेमाची गोष्ट’ फेम तेजश्री प्रधानचा यंदाच्या गणपतीत आहे खास प्लॅन; म्हणाली…

'होणारी सून मी ह्या घरची' या मालिकेतून घराघरात पोहोचलेली जान्हवी म्हणजे अभिनेत्री तेजश्री प्रधान आता 'प्रेमाची गोष्ट' या मालिकेतून प्रेक्षकांची भेटीस आली आहे. तब्बल दोन वर्षांच्या विश्रांतीनंतर तेजश्रीने पुन्हा एकदा मालिकाविश्वात दमदार पुनरागमन केलं आहे. 'प्रेमाची गोष्ट' या मालिकेत तेजश्री मुक्ता या भूमिकेत पाहायला मिळत आहे. या नव्या मालिकेत तेजश्रीबरोबर राज हंचनाळे, शुभांगी गोखले, अपूर्वा नेमळेकर, संजीवनी जाधव महत्त्वाच्या भूमिकेत पाहायला मिळत आहेत. तेजश्रीच्या या नव्या मालिकेला प्रेक्षकांचा चांगलाच प्रतिसाद मिळत आहे. अलीकडेच 'प्रेमाची गोष्ट' या मालिकेच्या निमित्ताने स्टार प्रवाहच्या इन्स्टाग्राम पेजवर एक तेजश्रीचा व्हिडीओ शेअर करण्यात आला होता; जो चांगलाच व्हायरल झाला होता. या व्हिडीओमध्ये तेजश्रीनं यंदाच्या गणपतीत तिचा काय प्लॅन आहे? याबाबत सांगितलं होतं. तेजश्री यंदाच्या गणपतीचा प्लॅन सांगत म्हणाली की, "माझ्या सख्या काकाकडे गोरेगावात गणपती असतो. त्यामुळे आम्ही सगळी भावंडं जमून छान मखर बनवू, डेकोरेशन करू आणि खूपच एन्जॉय करू." दरम्यान, तेजश्रीचं या नव्या भूमिकेवर प्रेक्षक भरभरून प्रेम करताना दिसत आहेत.