शाहरुख-सलमान नव्हे तर ऋतुजा बागवेच्या नवीन घरात आहे ‘या’ अभिनेत्याचा फोटो; म्हणाली, “प्रत्येक मुलीला…”

अभिनेत्री ऋतुजा बागवेने अलीकडेच ठाण्यापासून काही अंतरावर तिच्या स्वप्नातील सुंदर घर खरेदी केलं. अभिनेत्रीने घरातील प्रत्येक कोपरा आकर्षकरित्या सजवला आहे. ऋतुजाने तिच्या नव्या घराचे अनेक फोटो सोशल मीडियावर शेअर केले आहेत. तिच्या घरातून दिसणारा सुंदर व्ह्यू, हटके नेमप्लेट, भिंतीवर कोरलेलं विठ्ठलाचं नाव याचबरोबर आणखी एका फोटोने सध्या सर्वांचं लक्ष वेधून घेतलं आहे. अभिनेत्रीच्या नव्या घरात एका बॉलीवूड अभिनेत्याचा फोटो लावण्यात आला आहे. शाहरुख-सलमान नव्हे तर ऋतुजा बागवे रणबीर कपूरची खूप मोठी चाहती आहे. ऋतुजा सांगते, "रणबीर कपूर मला प्रचंड आवडतो. तो माझा आवडता अभिनेता आहे. सकाळी उठल्यावर त्याचा फोटो समोर दिसावा असं नेहमी वाटायचं म्हणून घरातल्या भिंतीवर खास रणबीरचा फोटो लावून घेतलाय." "माझ्या घरात येणाऱ्या प्रत्येक मुलीला ती भिंत आवडते." असंही अभिनेत्रीने सांगितलं. दरम्यान, ऋतुजा बागवेच्या घरातील साध्या आणि आकर्षक सजावटीचं सध्या सर्वत्र कौतुक करण्यात येत आहे.