शुभमंगल सावधान! अमृता देशमुख-प्रसाद जवादेच्या लग्नसोहळ्याचे खास फोटो

‘बिग बॉस मराठी’ फेम, ‘पुण्याची टॉकरवडी’ अशी ओळख असणारी अभिनेत्री अमृता देशमुखने अभिनेता प्रसाद जवादेबरोबर लग्नगाठ बांधली. अमृता आणि प्रसाद या दोघांचा विवाहसोहळा मोठ्या थाटामाटात संपन्न झाला. ग्रहमख, मेहंदी, हळद, संगीत अन् मग सप्तपदी असे सर्व सोहळे यावेळी पाहायला मिळाले. अमृता देशमुख आणि प्रसाद जवादे यांच्या लग्नाचे अनेक फोटो आणि व्हिडीओ सध्या व्हायरल होत आहेत. प्रसाद-अमृताने लग्नात सप्तपदी घेताना खास मराठमोळा लूक केला होता. अमृताने गुलाबी रंगाची भरजरी साडी, नाकात नथ, गळ्यात दागिने, कपाळी चंद्रकोर असा खास लूक केला होता. तर प्रसादनेही बायकोला साजेसं असं पिवळ्या रंगाचा कुर्ता आणि पांढऱ्या रंगाचा पितांबर नेसलं होतं. प्रसाद-अमृताने त्यांच्या लग्नातील खास क्षणाचा एक व्हिडीओही शेअर केला आहे. “आमच्या आयुष्यातील जादुई दिवस १८/११/२०२३” असं खास कॅप्शन त्यांनी या व्हिडीओला दिले होते. अमृता आणि प्रसादच्या लग्नाला अनेक मराठी सिनेसृष्टीतील कलाकारांनी हजेरी लावली. अभिनेत्री नम्रता संभेराव, आरोह वेलणकर, अनघा अतुल, रश्मी अनपट, सिद्धार्थ खिरीड, रसिका वेंगुर्लेकर, शुभांकर तावडे हे कलाकार उपस्थित होते. यावेळी अनेकांनी "आमच्या अमुचं लग्न..." असे कॅप्शन देत पोस्ट शेअर करताना दिसत आहेत.