“कर्ज काढलं, दागिने गहाण ठेवले अन्…”, कर्जतचं आलिशान फार्महाऊस प्राजक्ता माळीने का खरेदी केलं? जाणून घ्या…

‘जुळून येती रेशीमगाठी’ या मालिकेमुळे अभिनेत्री प्राजक्ता माळी घराघरांत लोकप्रिय झाली. कलाविश्वातील करिअरप्रमाणेच गेल्या काही वर्षांत प्राजक्ताने वैयक्तिक आयुष्यात देखील उंच भरारी घेतली आहे. स्वत:चा व्यवसाय सुरू केल्यावर जुलै २०२३ मध्ये प्राजक्ताने कर्जत येथे आलिशान फार्महाऊस खरेदी केलं. हे आलिशान फार्महाऊस अभिनेत्रीने कर्ज काढून घेतलेलं आहे. नुकत्याच एका मुलाखतीत प्राजक्ताने याविषयी खुलासा केला. प्राजक्ता माळीने फार्महाऊसच्या फोटोंना खानदानातील सर्वात मोठं कर्ज असं कॅप्शन दिलं होतं. याबद्दल सांगताना अभिनेत्री म्हणाली, “फार्महाऊस खरेदी करणं हे सर्वात मोठं धाडस आहे कारण, माझं एवढं बजेट नव्हतं. पण, त्या घराच्या मी पाहताक्षणी प्रेमात पडले आणि माझ्याकडची सगळी पुंजी पणाला लावली. "ही प्रॉपर्टी माझ्याकडे आयुष्यभर राहणार हे मला माहीत होतं. त्यात मला निसर्गाची प्रचंड आवड आहे. दहा-दहा दिवस असं बाहेर जाऊन एकांतात राहायला मला खूप आवडतं. म्हणून हे फार्महाऊस खरेदी करण्याचा मी निर्णय घेतला." असं प्राजक्ताने सांगितलं. हे फार्महाऊस खरेदी करताना अभिनेत्रीला तिच्या कुटुंबीयांची खूप मोठी साथ लाभली. प्राजक्ताच्या घरातील सगळ्या मंडळींनी या घरासाठी आपलं सोनं गहाणं ठेवलं होतं. अभिनेत्री याबद्दल सांगते, "माझ्या आईने एफडी मोडल्या, कर्ज काढलं, दागिने गहाण अन् भावाने चैन गहाण ठेवली. सगळ्या कुटुंबीयांना मला फार्महाऊस घेताना खूप मोठी मदत केली." फार्महाऊस खरेदी करताना प्राजक्ताच्या भावाच्या व वडिलांच्या मनात सुरुवातीला प्रचंड भीती होती. "पण, आईने या सगळ्यात तुला योग्य वाटेल तो निर्णय घे असं ठामपणे सांगितलं होतं. आईला नेहमीच माझ्यावर खूप विश्वास असतो.” असं प्राजक्ता माळीने सांगितलं. भविष्यात कर्जतसारखं आलिशान घर मुंबईत असावं अशी इच्छा प्राजक्ताने यावेळी व्यक्त केली. अभिनेत्रीच्या कर्जतच्या फार्महाऊसला 'महाराष्ट्राची हास्यजत्रा' कार्यक्रमातील बऱ्याच कलाकारांनी भेट दिली आहे. दरम्यान, प्राजक्ता माळीने तिच्या या आलिशान फार्महाऊसचे बरेच फोटो सोशल मीडियावर शेअर केले आहेत. ( सर्व फोटो सौजन्य : प्राजक्ता माळी )