Photos: ‘सातव्या मुलीची सातवी मुलगी’ मालिकेने पार केला ५०० भागांचा टप्पा, जंगी सेलिब्रेशनचे फोटो व्हायरल

‘झी मराठी’ वाहिनीवरील लोकप्रिय मालिकांपैकी एक ‘सातव्या मुलीची सातवी मुलगी’ मालिका आहे. सप्टेंबर २०२२ रोजी सुरू झालेल्या या मालिकेने आता लोकप्रियतेची एक वेगळी उंची गाठली आहे. ‘सातव्या मुलीची सातवी मुलगी’ मालिकेतील प्रत्येक कलाकारांनी आपआपले पात्र उत्तमरित्या निभावलं आहे. त्यामुळे प्रेक्षकांनाही ती पात्र आपलीशी वाटतं आहेत. मालिकेने आता ५०० भागांचा टप्पा गाठला असून हा खास क्षण जोरदार साजरा करण्यात आला. याचे फोटो, व्हिडीओ व्हायरल होतं आहेत. अभिनेत्री तितीक्षा तावडे व अभिनेता अजिंक्य ननावरे यांची प्रमुख भूमिका असलेल्या ‘सातव्या मुलीची सातवी मुलगी’ या मालिकेने वेगळ्या कथानकामुळे प्रेक्षकांना चांगलं खिळवून ठेवलं आहे. त्यामुळे यशस्वीरित्या या मालिकेने ५०० भागांचा टप्पा पार केला. यानिमित्ताने मालिकेतील कलाकार मंडळींसह संपूर्ण टीमने जंगी सेलिब्रेशन केलं. दोन मोठे केक कापून ‘सातव्या मुलीची सातवी मुलगी’ मालिकेच्या टीमने हा खास क्षण साजरा केला. यावेळी सगळ्या टीमला खास भेटवस्तू देण्यात आली. याशिवाय तुषार देवलने मालिकेचं शीर्षक गीत गायलं. याचा व्हिडीओ सोशल मीडियावर चांगलाच व्हायरल होतं आहे. ‘सातव्या मुलीची सातवी मुलगी’ या मालिकेत तितीक्षा, अजिंक्य व्यतिरिक्त ऐश्वर्या नारकर, सुरुची अडारकर, श्वेता मेहेंदळे, राहुल मेहेंदळे, मुग्धा गोडबोले-रानडे, रजनी वेलणकर, जान्हवी किल्लेकर, अमृता रावराणे, अनिरुद्ध देवधर, प्रशांत केणी, असे अनेक कलाकार महत्त्वाच्या भूमिकेत आहेत. (सर्व फोटो सौजन्य : झी मराठी इन्स्टाग्राम)