सख्ख्या बहिणी पोहोचल्या माहेरी! अभिनेत्रीचं कोकणात आहे टुमदार घर, ‘असा’ साजरा केला गौराईचा सण, पाहा फोटो…

मराठी सिनेविश्वातील अनेक कलाकार गणपतीच्या सणाला त्यांच्या गावी कोकणात जातात. दरवर्षीप्रमाणे यंदाही छाया कदम, निखिल बने, अंशुमन विचारे यांसारखे अनेक कलाकार कोकणात गेले होते. याचबरोबर अभिनेत्री तितीक्षा तावडेने सुद्धा गौरी-गणपतीचा सण तिच्या माहेरी साजरा केला. तितीक्षाचं माहेर कोकणातील सिंधुदुर्ग जिल्ह्यातील असरोंडी येथे आहे. आपल्या आई-बाबांसह अभिनेत्री अनेकदा माहेरी कोकणात जाते. गणेशोत्सवानिमित्त तितीक्षा आणि तिची मोठी बहीण अभिनेत्री खुशबू तावडे या दोघीही कोकणात गेल्या आहेत. तितीक्षाने शेअर केलेल्या फोटोंमध्ये खुशबूच्या मुलांची झलकही पाहायला मिळत आहे. अभिनेत्रीने युट्यूबवर व्हिडीओ शेअर करत तिच्या संपूर्ण असरोंडी गावची झलक चाहत्यांना दाखवली आहे. तितीक्षाचं माहेर खूपच सुंदर आहे. याठिकाणी त्यांचं सुंदर असं कौलारू घर आहे. मोठ्या प्रशस्त अंगणात छानसा झोपाळा आहे. अभिनेत्रीच्या घराजवळील निसर्गरम्य परिसर सर्वांचं लक्ष वेधून घेतो. तितीक्षा व खुशबू या दोघींनी माहेरी गौरी-गणपतीचा सण अतिशय उत्साहात साजरा केला. पारंपरिक पद्धतीने तावडे कुटुंबीयांच्या घरी गौराईचं आगमन झालं. सगळ्या कुटुंबीयांनी मिळून गौराई अन् गणपती बाप्पाची मनोभावे पूजा केल्याचं अभिनेत्रीच्या पोस्टमध्ये पाहायला मिळत आहे. तितीक्षाने शेअर केलेल्या फोटोंमध्ये गौरी विसर्जनाची परंपरा, कोकणातील संस्कृती याची झलक पाहायला मिळत आहे. तितीक्षा व खुशबू यांच्या असरोंडी गावचे सुंदर फोटो चाहत्यांच्या पसंतीस उतरले आहे. याशिवाय कोकणातील गणेशोत्सवाची झलक शेअर केल्याने चाहत्यांनी अभिनेत्रीचे आभारही मानले आहेत. ( सर्व फोटो सौजन्य : तितीक्षा तावडे व खुशबू तावडे इन्स्टाग्राम )