पुण्यात पावसाचा कहर, मुठा नदी पात्र तुडुंब भरल्याने सोसायट्यांमध्ये शिरले पाणी, सिंहगड रस्त्यावर बचावकार्य सुरू, पाहा फोटो!

महाराष्ट्रात पावसाने कहर केला आहे. काल मध्यरात्रीपासून बरसत असलेल्या मुसळधार पावसामुळे राज्यात अनेक ठिकाणी पाणी साचायला सुरुवात झाली आहे. हे छायाचित्र पुण्यातील आहे, लुल्लानगर उड्डाणपुल परिसरात सोसाट्याच्या वाऱ्यासह आलेल्या जोरदार पावसात रस्त्यालगतचे झाड उन्मळून पडले आहे. दरम्यान पुण्यातील मुठा नदीचे पात्र तुडुंब भरून वाहत आहे. त्यामुळे प्रशासन सतर्क झाले आहे. आज कोसळत असलेल्या मुसळधार पावसामुळे सिंहगड रस्त्यालगत असलेली मुठा नदी दुथडी भरून वाहत आहे. त्यामुळे नजीकच्या गृहनिर्माण सोसायट्यांमध्ये पाणी शिरल्याचे पाहायला मिळत आहे. त्यामुळे काही नागरिक घरात अडकून पडले आहेत. दरम्यान यामुळे नागरिकांमध्ये भीतीचे वातावरण तयार झाले आहे. दरम्यान सिंहगड रस्त्यावरील अडकून पडलेल्या नागरिकांना बाहेर काढण्यासाठी बचाव कार्य सुरु आहे. एनडीआरएफचे बचाव पथक बोटीसह तिथे दाखल झाले आहे. सिंहगड रस्त्यावरील ५ सोसायट्यांमध्ये पाणी शिरले आहे. एकता नगर परिसरातील द्वारका, जलपूजन, शारदा सरोवर, शाम सुंदर या सोसायट्यांना पाण्याने घेरले आहे. तसेच भिडे पूल पाण्याखाली गेला आहे. गरवारे कॉलेजमधील खिल्लारे वस्तीत, संगम पूल पुलासमोरील वस्तीत पाणी शिरल्याचे पाहायला मिळत आहे. नागरिकांना सुरक्षित बाहेर काढण्यासाठी पूर्ण प्रयत्न सुरु असल्याचे पुण्याचे पालकमंत्री तसेच राज्याचे उपमुख्यमंत्री अजित पवार यांनी सांगितले आहे. जोरदार पावसामुळे रस्त्यांना नदीचे रूप आले आहे. (All Photo Source : Express photograph by Arul Horizon 25/07/2024 Pune) हेही वाचा- Pune- Mumbai Rain Update: महाराष्ट्रात पावसाचा धुमाकूळ, धरणांची पाणी पातळी वाढली; बचावपथकांना सज्ज राहण्याचे प्रशासनाचे आदेश!