मातब्बर नेत्यांना बाजूला करून हर्षवर्धन सपकाळ यांना काँग्रेसने प्रदेशाध्यक्षपद का दिले? जाणून घ्या त्यांचा राजकीय प्रवास

काँग्रेसचे माजी आमदार हर्षवर्धन सपकाळ (Harshwardhan Sapkal) यांनी आज (१८ फेब्रुवारी) काँग्रेस प्रदेशाध्यक्ष पदाचा (Maharashtra Pradesh Congress Committee President) पदभार स्वीकारला. हर्षवर्धन सपकाळ हे राहुल गांधी यांचे निकटवर्तीय मानले जातात. हर्षवर्धन सपकाळ यांची राजकीय कारकीर्द जिल्हा परिषद सदस्य ते आमदार अशी तळागाळातून पुढे आली आहे. १९९९ ते २००२ या काळात हर्षवर्धन सपकाळ जिल्हा परिषदेचे अध्यक्ष होते. महाराष्ट्रातील सर्वात तरुण अध्यक्ष म्हणून त्यांचा त्यावेळी लौकिक होता. हर्षवर्धन सपकाळ हे २०१४ ते २०१९ पर्यंत बुलढाणा विधानसभा मतदारसंघाचे आमदार होते. हर्षवर्धन सपकाळ यांनी बुलढाना जिल्हा परिषदेचे अध्यक्ष म्हणूनही काम केले आहे. गेल्या काही काळात हर्षवर्धन सपकाळ यांनी पक्षासाठी राष्ट्रीय स्तरावरही काम केले असून, अनेक राज्यांच्या विधानसभा निवडणुकांमध्ये त्यांनी पक्षासाठी विविध भूमिका पार पाडल्या आहेत. अखिल भारतीय काँग्रेस समितीचे अध्यक्ष मल्लिकार्जुन खरगे यांनी महाराष्ट्र प्रदेश काँग्रेस समितीच्या अध्यक्षपदी हर्षवर्धन सपकाळ यांनी नियुक्ती केली आहे. हर्षवर्धन सपकाळ यांना राज्यभर दौरे करून पक्षाचे स्थानिक नेते व कार्यकर्त्यांमध्ये विश्वासाचे वातावरण तयार करावे लागेल. सपकाळ आर्थिकदृष्ट्या प्रबळ अशा कोणत्याही सहकारी संस्थांशी संबंधित नाहीत. यामुळेच महायुती सरकारच्या विरोधात आक्रमक भूमिका घेण्याच्या उद्देशानेच सपकाळ यांच्या नावाला पक्षाध्यक्ष मल्लीकार्जुन खरगे आणि लोकसभेतील विरोधी पक्षनेते राहुल गांधी यांनी पसंती दिली आहे. (सर्व फोटो - संखदीप बॅनर्जी, इंडियन एक्सप्रेस)