Photos: भाऊबीजेनिमित्त आठ बहिणींनी केलं अजित पवारांचं औक्षण; ‘पाकीट’ मात्र सुप्रिया सुळेंनाच दिलं; अन् नंतर…

सालाबादप्रमाणे यंदाही राष्ट्रवादी काँग्रेसचे अध्यक्ष शरद पवार यांच्या संपूर्ण कुटुंबाने बारामतीमध्ये दिवाळी साजरी केली. शरद पवार यांच्या बारामतीमधील निवासस्थानी दिवाळी सेलिब्रेशन झालं. राष्ट्रवादी काँग्रेसच्या खासदार आणि शरद पवार यांच्या कन्या सुप्रिया सुळे यांनी या दिवाळी सेलिब्रेशनचे काही खास फोटो सोशल मीडियावरुन शेअर केले आहेत. अगदी भाऊबीजेपासून ते दिवाळी पाडव्यापर्यंतचे फोटो सुळे यांनी शेअर केले आहेत. भाऊबीजेच्या दिवाशी शरद पवारांचं त्यांच्या बहिणींनी औक्षण केल्याचा व्हिडीओही सुप्रिया सुळेंनी पोस्ट केला आहे. मात्र या सर्व फोटो आणि व्हिडीओंपैकी माजी उपमुख्यमंत्री आणि विद्यमान विरोधी पक्षनेते अजित पवार यांच्यासमेत साजऱ्या केलेल्या भाऊबीजेचे फोटो सोशल मीडियावर चर्चेत आहेत. विशेष म्हणजे आठ बहिणींनी अजित पवारांना ओवाळल्यानंतर भेट म्हणून दिलेलं पाकिट मात्र अजित पवारांनी फक्त सुप्रिया सुळेंच्या हातात दिल्याचं दिसून आलं. नेमकं काय घडंल पाहूयात. सुप्रिया यांनी आपल्या सर्वच भावांना ओवाळतानाचे फोटो फेसबुकवर शेअर केले आहेत. भाऊबीजेच्या निमित्ताने बहीण-भाऊ यांच्या नात्यांतील बंध आणखी घट्ट होतात, अशा कॅप्शनसहीत सुप्रिया यांनी एक व्हिडीओही शेअर केला आहे. आम्ही सर्व बहिणींनी अजितदादांचे औक्षण करुन अभिष्टचिंतन केले, असं म्हणत सुप्रिया यांनी आपल्या आठ बहिणींसोबत अजित पवारांना ओवाळताना छोटा व्हिडीओ पोस्ट केला आहे. तसेच भाऊबीजेच्या वेळीचे आनंदाचे काही क्षण म्हणत त्यांनी अजित पवारांबरोबरचे फोटो शेअर केले आहेत. या फोटोंमध्ये अजित पवार, सुप्रिया सुळे आणि त्यांच्या भगिनी मनसोक्तपणे हसताना दिसत आहेत. सुप्रिया सुळेंनी पोस्ट केलेल्या व्हिडीओमध्ये त्या अजित पवारांचं औक्षण करुन झाल्यानंतर त्यांना वाकून नमस्कार करताना दिसत आहेत. इतरही बहिणी मोठ्या भावाचा आशीर्वाद घेण्यासाठी अजित पवारांच्या पायाला वाकल्या. दरम्यान एकीकडे बहिणी पाया पडण्यासाठी लगबग करत असताना ओवाळून झाल्यानंतर अजित पवारांनी भेटवस्तू म्हणून एक पाकिट सुप्रिया सुळेंच्या हातात टेकवलं. आता ओवाळलं आठ बहिणींनी आणि पाकिट सुप्रिया सुळेंनाच का असा प्रश्न तुम्हालाही पडला असेलच. मात्र सुप्रिया सुळेंच्या हातात पाकीट दिल्यानंतर अजित पवारांनी हातवारे करुनच तुमच्या सगळ्यांमध्ये हे वाटून घ्या असं सांगितल्याचं दिसून आलं. त्यानंतर सर्वच बहिणी मोठ्याने हसत असल्याचं दिसून आलं.