Photos: …म्हणून दुबईत असतानाच विराट झाला ‘अलिबागकर’; जाणून घ्या नेमकं काय घडलं

भारताचा स्टार क्रिकेटर विराट कोहलीचा आज वाढदिवस आहे. आपल्या धुवांधार बॅंटिगने क्रिकेटप्रेमींच्या मनावर राज्य करणारा विराटही आता अलिबागकर झाला आहे. विराटने सप्टेंबर महिन्यात गणेशोत्सवाच्या मुहुर्तावर अलिबागमध्ये आठ एकर जागेचा प्लॉट खरेदी केला. सेलिब्रिटींप्रमाणे अलिबागची भूरळ विराटलाही पडली. अलिबागकर होण्याचा मोह त्याला आवरता आला नाही, असंच म्हणावं लागेल. परंतु, अलिबागमधील झिराड येथे प्लॉट खरेदी केला तेव्हा सप्टेंबर महिन्यात विराट आशिया कप क्रिकेटसाठी दुबईत होता. मग दुबईमध्ये असताना विराट अलिबागकर कसा काय झाला? नेमकं काय घडलं होतं जाणून घेऊया. खरं तर प्लॉट खरेदी करण्याच्या आधीच सहा महिन्यांपूर्वी विराट कोहली आणि त्याची पत्नी बॉलिवूड अभिनेत्री अनुष्का शर्मा यांनी झिराड येथे येऊन जागेची पाहणी केली होती. परंतु, क्रिकेटच्या मॅचमध्ये व्यग्र असल्यामुळे कोहलीला अलिबागमध्ये येऊन जागेचा व्यवहार पूर्ण करता येत नव्हता. त्यामुळे गणपतीच्या आदल्या दिवसाचा मुहूर्त साधत कोहलीचा लहान भाऊ विकास कोहली याने ‘पॉवर ऑफ अटर्नी’द्वारे विराट कोहलीसाठी व्यवहार पूर्ण केला. कोहलीने अलिबागमध्ये खरेदी केलेल्या जमिनीची एकूण किंमत १९ कोटी २४ लाख ५० हजार रुपये इतकी आहे. यासाठी कोहलीला ३ लाख ३५ हजार रेडीरेकनरनुसार १ कोटी १५ लाख ४५ हजार रुपयांची स्टॅम्प ड्युटी भरावी लागली होती. अलिबागसारख्या निसर्गरम्य परिसरात जागा खरेदी करण्याचा मोह सेलिब्रिंटीप्रमाणे आता क्रिकेटरलाही होत आहे. कोहलीआधी रोहित शर्मानेही अलिबाग जागा खरेदी केली होती. तर रवी शास्त्री यांनी दहा वर्षांपूर्वीच अलिबागमध्ये घर बांधलं आहे. (सर्व फोटो : विराट कोहली/ इन्स्टाग्राम) (हेही पाहा >> “तेव्हा मी वेड्यासारखा…”; विराट कोहलीने सांगितला होता अनुष्काशी पहिल्या भेटीचा किस्सा)