पुणे : कोथरूड गोळीबार प्रकरणातील आरोपी नीलेश घायवळच्या पारपत्राची पोलीस पडताळणी करणाऱ्या अहिल्यानगरमधील अहमदपूर विभागातील तत्कालीन पोलीस निरीक्षक, पोलीस कर्मचाऱ्यांची भूमिका संशयास्पद वाटल्याने त्यांना नोटीस बजाविण्यात आली आहे. या प्रकरणात त्यांची चौकशी करण्यात येणार आहे. चौकशीसाठी उपस्थित राहण्याची सूचना त्यांना नोटिशीद्वारे देण्यात आली आहे.
‘घायवळने अहिल्यानगर ग्रामीण पाेलीस दलातील अहमदनगर विभागातून बनावट कागदपत्रे सादर केली. ‘घायवळ’ ऐवजी ‘गायवळ’ नावाने बनावट कागदपत्रे सादर करून २०१९ मध्ये घायवळने पारपत्र मिळवले. अहमदपूर पोलिसांनी पारपत्र पडताळणी (पासपोर्ट व्हेरिफिकेशन) केली होती. या प्रकरणाची पुणे पोलिसांकडून चाैकशी सुरू करण्यात आली आहे. चौकशीत अहमदपूर येथील विशेष शाखेतील पारपत्र विभागात कार्यरत असलेल्या तत्कालीन पोलिस निरीक्षक आणि कर्मचाऱ्यांना चौकशीसाठी हजर राहण्याची नोटीस देण्यात आली आहे, असे पोलीस आयुक्त अमितेश कुमार यांनी सांगितले.
कोथरूड गोळीबार प्रकरणातील आरोपी नीलेश घायवळ सध्या युरोपात आहे. त्याच्या प्रत्यार्पणासाठी पोलिसांकडून केंद्र शासनाशी पत्रव्यहार करण्यात आला आहे. याबाबत आंतराष्ट्रीय पोलीस संघटनेशी (इंटरपोल) संपर्क साधण्यात आला आहे. घायवळला ताब्यात घेण्यासाठी ब्लू काॅर्नर नोटीस बजाविण्यात आली आहे.
घायवळविरुद्ध आणखी गुन्हे दाखल होण्याची शक्यता
घायवळविरुद्ध आणखी काही गुन्हे दाखल होण्याची शक्यता आहे. घायवळ दुसऱ्या एका व्यक्तीच्या नावाने असलेले सीमकार्ड वापरत आहे. घायवळने अहिल्यानगरमधून पारपत्र काढण्यापूर्वी तेथे भाड्याने घर घेतल्याची माहिती तपासात मिळाली. घायवळ याच्या कोथरूडमधील घरात पोलिसांनी छापा टाकला. तेव्हा तेथून एक भाडेकरार जप्त करण्यात आला आहे.
कोथरूडमधील पोलीस निरीक्षकाची चौकशी
नीलेश घायवळविरुद्ध यापूर्वी महाराष्ट्र संघटित गुन्हेगारी नियंत्रण कायद्यान्वये (मकोका) कारवाई करण्यात आली होती. या प्रकरणात न्यायालयाने त्याला जामीन मंजूर केला होता. ३० नोव्हेंबर २०२२ रोजी न्यायालयाने त्याला कोथरूड पोलिसांकडे पारपत्र जमा करण्यास सांगितले होते. त्याने जमा केले नव्हते. त्याअनुषंगाने कोथरूड पोलीस ठाण्यातील तत्कालीन पोलीस निरीक्षकाकडे चौकशी केली जाणार आहे, असे पोलीस आयुक्त अमितेश कुमार यांनी सांगितले.