ठाणे : काँग्रेसचे नेते राहुल गांधी हे शनिवारी ठाण्यात येणार असून ते शिवसेनेचे दिवंगत नेते आनंद दिघे यांच्या टेंभीनाका येथील स्मारकाला पुष्पाहार अर्पण करणार आहेत. भिवंडी येथील आनंद दिघे चौकात ते आज, शुक्रवारी सभा घेणार आहेत. त्यामुळे आनंद दिघे यांची भुरळ काँग्रेसचे नेते राहुल गांधी यांना पडली असल्याची चर्चा ठाण्यात सुरू झाली आहे. शिवसेनेचे दिवंगत नेते आनंद दिघे यांच्या कामाचा आवाका ठाणे, मुंबई, पालघर या भागात मोठा होता. त्यामुळे त्यांच्या निधनानंतरही सर्वच पक्षातील नेते त्यांचा आजही आदर करतात.
मुख्यमंत्री एकनाथ शिंदे, खासदार राजन विचारे यांच्यासह ठाणे जिल्ह्यातील अनेक नेत्यांचे आनंद दिघे हे राजकीय गुरु होते. शनिवारी राहुल गांधी हे भारत जोडो न्याय यात्रेनिमित्ताने ठाण्यात येणार आहे. मुंब्रा येथील कौसा भागातून त्यांची यात्रा सुरू होणार आहे. कळवा येथे आल्यानंतर राहुल गांधी हे छत्रपती शिवाजी महाराज यांच्या स्मारकाला पुष्पहार अर्पण करतील. त्यानंतर कोर्टनाका येथे डाॅ. बाबासाहेब आंबेडकर यांच्या स्मारकाला पुष्पहार अर्पण करतील.
हेही वाचा : राहुल गांधींची ‘भारत जोडो न्याय यात्रा’ भिवंडीत, सुरक्षेसाठी ‘यावर’ बंदी…
येथील काही मीटर अंतरावरील टेंभीनाका परिसरात आनंद दिघे यांचे मठ आहे. या आनंद मठाजवळच आनंद दिघे यांचे स्मारकही बांधण्यात आले आहे. या स्मारकाला राहुल गांधी पुष्पहार अर्पण करतील. तसेच भिवंडीत आज, शुक्रवारी राहुल गांधी यांची चौक सभा होणार आहे. ही चौक सभा देखील भिवंडीतील आनंद दिघे चौकात होणार आहे. त्यामुळे आनंद दिघे यांची भुरळ काँग्रेसचे नेते राहुल गांधी यांना पडली असल्याची चर्चा ठाण्यात सुरू झाली आहे.