ठाणे : भ्रष्टाचार करणारे नाही तर हिंदू मुस्लिम दंगल घडविणारे खरे देशद्रोही असतात. देशाची सत्ता चालविण्यासाठी सत्ताधाऱ्यांना हिंदू मुस्लिम वादासारखी कारणे शोधावी लागत आहेत. त्यामुळे या देशात भाजप हा एक देशद्रोही पक्ष असल्याचं वक्तव्य योगेंद्र यादव यांनी बुधवारी ठाण्यात केले.
भारत जोडो अभियान, ठाणे यांच्या वतीने लोकशाही संमेलनाचे आयोजन करण्यात आले होते. हे संमेलन लोकशाही, संविधान आणि मताधिकार या विषयावर पार पडले. या संमेलनात शाहीर संभाजी भगत यांनी संविधान तसेच सध्याच्या राजकीय घडामोडीवर गाण्याच्या माध्यमातून भाष्य केलं. त्यासह, ज्येष्ठ सामाजिक कार्यकर्ते योगेंद्र यादव, भारत जोडो यात्रेच्या महाराष्ट्राच्या संयोजिका उल्का महाजन आणि डॉ संजय मंगला गोपाळ यांनी संमेलनाला संबोधित केले.
हेही वाचा : कल्याण पूर्वेतील बंडखोर शहरप्रमुख महेश गायकवाड; यांच्यासह नऊ जणांची शिवसेनेतून हकालपट्टी
यावेळी बोलताना योगेंद्र यादव म्हणाले, महाराष्ट्रात तीन पक्ष मिळून उभं राहिलेलं सरकार आहे. हे केवळ भाजप आणि त्याचे दोन एक्स्टेंशन आहे. दहा वर्षा पूर्वीच महाराष्ट्राचं राजकारण हे एक इतर राज्यांसमोरच मॉडेल होत. इतर राज्यातील नेते हे केवळ उद्या पुरत बोलायचे पण महाराष्ट्रातील नेते पुढील दहा ते पंधरा वर्षाचं बोलायचे त्यामुळे या राज्याचे राजकारण माझ्यासाठी एक प्रकारचं मॉडेल होत. परंतु, गेल्या दहा वर्षात महाराष्ट्राचे राजकारण खूप बदलले आहे. उद्धव ठाकरेंची ज्याप्रकारे सत्ता बरखास्त केली आणि फसवणूक जे सरकार उभे केले. ते सरकार म्हणजे लूटमारीचे आणि फुटीचे सरकार आहे, असे मत योगेंद्र यादव यांनी मांडले. मागील एका भाषणात देशाचे पंतप्रधान नरेंद्र मोदी हे स्वतः एनसीपी म्हणजे नेचरली करप्ट पार्टी असा उल्लेख करत अजित पवार यांचा उल्लेख केला होता. परंतु, आज त्याच अजित पवार सोबत महाराष्ट्रात भाजप सत्तेत आहे, अशी टीका ही यादव यांनी केली.
© The Indian Express (P) Ltd