कायदा आणि सुव्यवस्था तसेच विकासाच्या मुद्दय़ावर ममता बॅनर्जी सहानुभूती मिळवण्याच्या प्रयत्नात आहेत. तर तिसऱ्या आघाडीचे नेतृत्व करत असलेल्या डाव्या पक्षांच्या दृष्टीने ही प्रतिष्ठेची झुंज आहे. काँग्रेसला आपली ताकद दाखवून द्यायची आहे तर भाजपला मोदींच्या करिष्म्याची आशा आहे. अशा स्थितीत पश्चिम बंगालमधील सामना रंगत जाणार आहे. निकालानंतरची सत्तासमीकरणाच्या दृष्टीने ममता बॅनर्जीची भूमिका महत्त्वाची ठरणार आहे.
डाव्यांकडून नवे चेहरे
डाव्या पक्षांची राज्यात मजबूत संघटना आहे. त्यांची मतेही ४० टक्क्यांच्या आसपास राहिलेली आहेत. प्रतिमा सुधारण्यासाठी यावेळी २६ नवे चेहरे उतरवत डाव्या पक्षांनी ममतांना रोखण्याचा इरादा स्पष्ट केला आहे. डाव्यांच्या तीन दशकांच्या राजवटीत कारखाने बंद पडले, कायदा आणि सुव्यवस्था कोलमडली असा तृणमूलचा प्रचार अजूनही प्रभावी ठरतोय अशी चिन्हे आहेत. त्यामुळे डाव्या पक्षांपुढे पूर्वीच्या १५ जागा टिकवण्याचे आव्हान आहे.
डाव्यांच्या पहिल्या यादीत १२ मुस्लिम उमेदवार आहेत. २५ वर्षीय विद्यार्थी नेता शेख इब्राहिम अली याला उमेदवारी देत वेगळा संदेश देण्याचा प्रयत्न मार्क्‍सवादी कम्युनिस्ट पक्षाने केला आहे. माकप ३२ जागा लढवणार असून १० जागा भाकप, फॉरवर्ड ब्लॉक आणि क्रांतिकारी समाजवादी पक्ष हे डाव्या आघाडीतील घटक लढवणार आहेत. काँग्रेस आणि भाजपला बंगालमध्ये चांगल्या कामगिरीचे आव्हान आहे. गेल्यावेळच्या सहा जागा राखण्याचे काँग्रेसपुढे आव्हान आहे. भाजपने कोलकत्यात मोदींची सभा आयोजित करून शक्तिप्रदर्शन केले, मात्र प्रत्यक्षात मतांमध्ये त्याचा कितपत फायदा होईल याबाबत शंका आहे. एकूणच काय पश्चिम बंगालमध्ये जरी चौरंगी लढत असली, तरी प्रत्यक्षात पुन्हा डाव्यांशी दोन हात करून ममता अधिकाधिक जागा जिंकून दिल्लीच्या सत्ताकारणात आपले महत्त्व वाढवण्याचा प्रयत्न करून आपल्या मागण्या मान्य करून घ्यायचा त्यांचा प्रयत्न राहील.
रंगतदार लढती
बांकुरा मतदारसंघातून तृणमूल काँग्रेसतर्फे प्रख्यात अभिनेत्री मुनमुन सेन, तर नेताजी सुभाषचंद्र बोस यांचे नातू सुगता बोस जाडवपूरमधून रिंगणात हुगळी मतदारसंघातून विख्यात पत्रकार आणि भाजपचे राज्यसभा सदस्य चंदन मित्रा यांना उमेदवारी कोलकाता उत्तर मतदारसंघातून काँग्रेसचे जुने कार्यकर्ते सोमेन मित्रा यांनी पक्षांतर्गत निवडणूक जिंकत उमेदवारी पटकावली.
रायगंजमध्ये काँग्रेस नेते प्रियरंजन दासमुन्शी यांचे बंधू सत्यरंजन तृणमूलचे उमेदवार सध्या प्रियरंजन यांच्या पत्नी आणि केंद्रीय मंत्री दीपा दासमुन्शी काँग्रेसकडून या मतदारसंघाचे प्रतिनिधित्व करतात. ममतांचे भाचे आणि तृणमूलच्या युवा शाखेचे अध्यक्ष अभिषेक बंडोपाध्याय डायमंड हार्बरमधून उमेदवार.