कराड : कराड आणि मलकापूर ही शहरे आधुनिक करणे, हेच उद्दिष्ट असल्याची ग्वाही भाजपचे जिल्हाध्यक्ष, आमदार डॉ. अतुल भोसले यांनी दिली. मलकापूर नगरपालिकेत भाजपचे पाच उमेदवार बिनविरोध निवडून आल्याने पक्षाचे मनोबल उंचावले असून, मलकापूर आणि कराडचाही नगराध्यक्ष निश्चितपणे भाजपचाच असेल, असा दावा त्यांनी केला.
कराड नगरपालिकेच्या निवडणुकीसाठी भाजपच्या प्रचारास मंगळवारी सुरुवात करण्यात आली. डॉ. भोसले, कराडच्या नगराध्यक्षपदाचे भाजपचे उमेदवार विनायक पावसकर तसेच नगरसेवकपदाचे उमेदवार यांच्या उपस्थितीत माजी उपपंतप्रधान यशवंतराव चव्हाण यांच्या समाधीस्थळी अभिवादन करण्यात आले. या नंतर डॉ. भोसले पत्रकारांशी संवाद साधला.
माजी नगराध्यक्ष जयवंत पाटील यांनी भाजप लबाड पक्ष असून, लोकांना वापरून घेवून बाजूला करतो, या केलेल्या टीकेवर डॉ. भोसले म्हणाले, नगराध्यक्षपदासाठी १६ जण इच्छुक होते. पक्षाने कोर कमिटीमार्फत अनुभवी उमेदवाराला संधी दिली. आमदार म्हणून कुणालाही शब्द देण्याचा मला अधिकार नव्हता. त्यामुळे फसवणुकीचा प्रश्नच येत नाही. गेल्या ३५ वर्षांपासून पावसकर यांनी सातत्याने काम केले. भाजपचे कमळ चिन्ह कठीण काळातही पुढे नेले. विधानसभा निवडणुकीत प्रामाणिकपणे काम केले. त्यामुळे त्यांची निवड न्याय्य असल्याचे डॉ. भोसले यांनी सांगितले.
वेणूताई चव्हाण उपजिल्हा रुग्णालयाचा ट्रामा केअर सेंटरसह पुनर्विकास, शहरातील रस्ते, वाहतूक, वाहनतळ, पाणीपुरवठा आदी मूलभूत सुविधा तसेच प्रीतिसंगम बागेचा पुनर्विकास, नेकलेस रोड, नदीकाठी संरक्षण भिंत या सर्वांचा समावेश असलेली एक मोठी योजना (मेगा प्लॅन) मुख्यमंत्री देवेंद्र फडणवीस यांच्याकडे मी सादर केली असल्याचे त्यांनी सांगितले.
मलकापूरमध्ये पाच नगरसेवक बिनविरोध झाले, ही आमच्या कामाची पोहोच पावती आहे. जुन्या- नव्यांना सोबत घेऊन काम करण्याचा प्रयत्न आहे. मनोहर शिंदे आणि अशोक थोरात यांना चार दशकांनंतर एकत्र आणण्यात यश आल्याचे समाधान डॉ. भोसले यांनी व्यक्त केले.
चारित्र्य, अनुभव व कामाचा विचार
नगराध्यक्षपदासाठी उमेदवारांचा चारित्र्य, अनुभव आणि त्यांनी केलेल्या कामाचा बारकाईने अभ्यास करूनच कोर कमिटीने विनायक पावसकरांना निवडले. त्यामुळे कुणावरही अन्याय झाला नाही. विधानसभेसारखीच साथ जनता या निवडणुकीतही देईल असा विश्वास डॉ. भोसले यांनी व्यक्त केला.