Maharashtra Cabinet Expansion : विधानसभेच्या निवडणुकीनंतर राज्यात महायुतीचं सरकार स्थापन झालं आहे. ५ डिसेंबर रोजी देवेंद्र फडणवीस यांनी मुख्यमंत्री पदाची शपथ घेतली, तर एकनाथ शिंदे आणि अजित पवार यांनी उपमुख्यमंत्री पदाची शपथ घेतली. त्यानंतर आज (१५ डिसेंबर) महायुती सरकारच्या मंत्रिमंडळाचा विस्तार नागपूरमध्ये पार पडला आहे. गेल्या काही दिवसांपासून मंत्रिमंडळाच्या विस्ताराबाबत राजकीय वर्तुळात वेगवेगळ्या चर्चा रंगल्या होत्या. तसेच महायुतीत मंत्रि‍पदावरून रस्सीखेच सुरु असल्याचंही बोललं जात होतं. मात्र,आज अखेर महायुती सरकारच्या मंत्रिमंडळाचा विस्तार झाला.
नागपूरमधील राजभवनावर मंत्र्‍यांचा शपथविधी सोहळा पार पडला आहे. दरम्यान, महायुतीत राष्ट्रवादी (अजित पवार) पक्षाला आणि शिवसेना (शिंदे) पक्षाला किती मंत्रि‍पदे मिळतात? आणि कोणत्या नेत्यांना मंत्रि‍पदाची संधी मिळते? तसेच या मंत्रिमंडळात कोणत्या नवनिर्वाचित चेहऱ्यांना संधी देण्यात येते? याकडे अनेकांचं लक्ष लागलं होतं. अखेर आज मंत्रिमंडळाचा विस्तार पार पडला आहे. यामध्ये राष्ट्रवादी (अजित पवार) पक्षाच्या ९ नेत्यांनी मंत्रि‍पदाची शपथ घेतली आहे.
हेही वाचा : Live: पंकजा मुंडे यांचे जोरदार कमबॅक, कॅबिनेट मंत्रीपदाची घेतली शपथ
राष्ट्रवादीच्या (अजित पवार) कोणत्या नेत्यांनी मंत्रि‍पदाची शपथ घेतली?
-हसन मुश्रीफ, धनंजय मुंडे, दत्तात्रय भरणे, आदिती तटकरे, माणिकराव कोकाटे, नरहरी झिरवाळ, मकरंद जाधव, बाबासाहेब पाटील यांनी कॅबिनेट मंत्रीपदाची शपथ घेतली, तर इंद्रनील नाईक यांनी राज्यमंत्री पदाची शपथ घेतली.
| क्र. | मंत्र्याचं नाव | मंत्रीपद |
| १ | हसन मुश्रीफ | कॅबिनेट मंत्री |
| २ | धनंजय मुंडे | कॅबिनेट मंत्री |
| ३ | दत्तात्रय भरणे | कॅबिनेट मंत्री |
| ४ | आदिती तटकरे | कॅबिनेट मंत्री |
| ४ | माणिकराव कोकाटे | कॅबिनेट मंत्री |
| ६ | नरहरी झिरवाळ | कॅबिनेट मंत्री |
| ७ | मकरंद जाधव | कॅबिनेट मंत्री |
| ८ | बाबासाहेब पाटील | कॅबिनेट मंत्री |
| ९ | इंद्रनील नाईक | राज्यमंत्री |
कोणत्या पक्षाला किती मंत्रि‍पदे मिळाली?
महायुती सरकारच्या मंत्रिमंडळाचा विस्तार झाला आहे. आज मंत्रिपदाचा शपथविधी पार पडला. या मंत्रिमंडळात ३३ कॅबिनेट तर ६ राज्यमंत्री अशी ३९ आमदारांचा शपथविधी संपन्न झाला आहे. यामध्ये भाजपाचे १९, राष्ट्रवादी ९ तर शिवसेनेच्या ११ आमदारांनी शपथ घेतली आहे.
© IE Online Media Services (P) Ltd