Maharashtra Cabinet Expansion News, 09August 2022: गेल्या महिन्याभरापासून प्रलंबित असलेला राज्य मंत्रिमंडळाचा विस्तार अखेर पार पडला आहे. राजभवनावर हा शपथविधी पार पडला. पहिल्या टप्प्यात शिंदे गट आणि भाजपाकडून प्रत्येकी नऊ अशा एकूण १८ मंत्र्यांचा मंत्रिमंडळात समावेश करण्यात आला आहे. शिंदे गटाकडून तानाजी सावंत, उदय सामंत, संदीपान भुमरे, दादा भुसे, अब्दुल सत्तार, दीपक केसरकर, शंभूराज देसाई, संजय राठोड, गुलाबराव पाटील यांना मंत्रिमंडळात स्थान मिळालं आहे. तर भाजपाकडून गिरीश महाजन, चंद्रकांत पाटील, सुधीर मुनगंटीवार, सुरेश खाडे, राधाकृष्ण विखे पाटील, अतुल सावे, रवींद्र चव्हाण, विजयकुमार गावित, मंगलप्रभात लोढा यांना संधी देण्यात आली आहे.
संजय राठोड यांचा मंत्रिमंडळात समावेश करण्यात आल्याने भाजपा नेत्या चित्रा वाघ यांनीच विरोध दर्शवला असल्याने नवा वाद निर्माण झाला आहे. तर दुसरीकडे एकाही महिला नेत्याला संधी न देण्यात आल्याने सरकारवर टीका होत आहे.
Maharashtra Mantrimandal Vistar 2022 Updates: देशाच्या स्वातंत्र्यांचा अमृतमहोत्सव आणि विधिमंडळाचे पावसाळी अधिवेशन लक्षात घेता छोटेखानी विस्तार करण्याचा भाजपा पक्षश्रेष्ठींचा निर्णय
गेल्या महिन्याभरापासून प्रतिक्षा असलेला मंत्रिमंडळ विस्तार अखेर पार पडत आहे. राजभवनात शपथविधीला सुरुवात झाली आहे.
एकनाथ शिंदेंनी सर्वांना न्याय देण्याचा प्रयत्न केला आहे. नाराज होण्यासारखं काही नाही. प्राथमिकतेनुसार संधी देण्यात आली आहे. एकनाथ शिंदे यांनी बैठकीत सर्वांशी संवाद साधला असून भविष्यात कशा पद्दतीने काम करायचं आहे याबद्ल सांगितलं. प्रत्येक आमदाराने आपल्या मतदारसंघात काम केलं पाहिजे अशा सूचनाही त्यांनी केल्या असल्याचं संजय शिरसाट यांनी सांगितलं आहे.
सह्याद्री अतिथीगृहावर झालेल्या बैठकीनंतर एकनाथ शिंदे आमदारांसोबत बाहेर आले आहेत. यावेळी नाराज असल्याची चर्चा असणारे संजय शिरसाटदेखील सोबत आहेत. सर्व आमदार राजभवनाच्या दिशेने निघाले असून काहीच वेळात शपथविधी पार पडणार आहे.
राधाकृष्ण विखे पाटील, चंद्रकांत पाटील, रवींद्र चव्हाण, सुधीर मुनगंटीवार, विजय गावीत, गुलाबराव पाटील, मंगलप्रभात लोढा, अतुल सावे, शंभूराज देसाई, अब्दुल सत्तार, रवींद्र चव्हाण, संजय राठोड, संदीपान भुमरे, दीपक केसरकर, दादा भुसे, तानाजी सामंत आज शपथ घेणार आहेत.
राजभवनात जोरदार तयारी करण्यात आली असून नेते पोहोचण्यास सुरुवात झाली आहे. थोड्याचे वळात मंत्रिमंडळ विस्ताराला सुरुवात होणार आहे.
भाजपामध्ये कोणतीही नाराजी नाही. नेतृत्व जो निर्णय घेतं, तो आम्हाला मान्य असतो. निमंत्रणं पाठवण्यात आली असून, संख्या मर्यादित ठेवण्यात आली आहे असं रावसाहेब दानवे यांनी सांगितलं आहे. एकनाथ शिंदे आणि देवेंद्र फडणवीस सरकारच्या मागे केंद्र सरकार खंबीरपणे उभे असल्याचंही ते म्हणाले आहेत.
सह्याद्री गेस्ट हाऊसवर शिंदे गटातील नेत्यांची बैठक
Maharashtra | MLAs of Eknath Shinde camp arrive at Sahyadri Guest House in Mumbai where a meeting is taking place this morning.
— ANI (@ANI) August 9, 2022
Maharashtra cabinet expansion is likely to take place today. pic.twitter.com/mbwntOVXPj
संधी न मिळाल्याने शिवेसना-भाजपाचा कर्मठ कार्यकर्ता कधीच नाराज होत नाही. आज ९ ऑगस्टलाच मंत्रिमंडळ विस्तार होत असल्याने 'भारत छोडो'च्या प्रेरणेने शिंदे आणि फडणवीसांच्या नेतृत्वाखाली नवीन मंत्रीमंडळ भ्रष्टाचाराला गाढून टाकेल आणि विकासाची गंगा पुढे घेऊन जाईल असं आशिष शेलार यांनी सांगितलं आहे.
संजय शिरसाट मंत्रिमंडळात स्थान न मिळाल्याने नाराज असल्याची माहिती मिळत आहे. मुख्यमंत्री एकनाथ शिंदे यांच्यासोबत झालेल्या बैठकीत संजय शिरसाट यांनी नाराजी जाहीर केली असून, यावेळी खडाजंगी झाल्याची सूत्रांची माहिती आहे. त्यामुळे अंतिम यादीत संजय शिरसाट यांचं नाव असेल की नाही हे पहावं लागणार आहे.
जुन्या नेत्यांना संधी देणं योग्य निर्णय आहे. एकनाथ शिंदे जो काही निर्णय घेतील तो सर्वांना मान्य असेल. गुवाहीमधील बैठकीत एकनाथ शिंदे निर्णय घेतील तो आनंदाने मान्य करु असं सर्वांनी सांगितलं होतं. नवीन आमदार अजिबात नाराज नाहीत असं शहाजीबापू पाटील यांनी सांगितलं आहे.
पुन्हा संधी दिल्याबद्दल पंतप्रधान नरेंद्र मोदी, भाजपाध्यक्ष जे पी नड्डा, अमित शाह, देवेंद्र फडणवीस यांचे मी आभार मानतो. त्यांनी माझ्यावर विश्वास दाखवला असून, ही मोठी जबाबदारी आहे असं राधाकृष्ण विखे पाटील यांनी एबीपी माझाशी बोलताना म्हटलं आहे.
नरेंद्र मोदींसारखं सक्षम नेतृत्व पक्षाकडे असून, विश्वनेता म्हणून त्यांच्याकडे पाहिलं जात आहे. ज्या गतीने देशाची प्रगती होत आहे, तशीच राज्याची होईल. सर्व आव्हानांना आम्ही सामोरे जाऊ. फडणवीसांचा अनुभव पाहता आणि शिंदे यांच्या साथीने आम्ही सर्व अडचणींवर मात करु असंही ते म्हणाले आहेत.
गेल्या अडीच वर्षात महाविकास आघाडीकडून राज्याची अधोगती झाली असून, आता जनतेचं सरकार आलं असल्याचंही त्यांनी सांगितलं.
राज्य मंत्रिमंडळाचा छोटेखानी विस्तार आज पार पडणार असून पहिल्या टप्प्यात मंत्रिमंडळात २० ते २२ मंत्र्यांचा समावेश होण्याची शक्यता आहे. याच पार्श्वभूमीवर शिवसेनेचे खासदार विनायक राऊत यांनी ३९ दिवसांपासून राज्याचं मंत्रालय सचिवालय झालं आहे, आज तरी ते मंत्रालय व्हावे अशी इच्छा आहे असा टोला एबीपी माझाशी बोलताना लगावला आहे. ज्यांना मंत्रिमंडळात तापुरती संधी मिळेल ती लखलाभ असो असंही ते म्हणाले आहेत.
संजय राठोड आपल्या पत्नीसह मुख्यमंत्री एकनाथ शिंदे यांच्या भेटीसाठी पोहोचले होते. मात्र या बैठकीनंतर निघताना त्यांच्या चेहऱ्यावर नाराजी दिसत होती. यामुळे मंत्रिमंडळातून त्यांचा पत्ता कट झाल्याची चर्चा सुरु आहे. त्यांनी यावेळी प्रसारमाध्यमांशी बोलण्यासही नकार दिला.
मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी मला शब्द दिला होता. येणाऱ्या विस्तारात मंत्रीपद देऊ असं ते म्हणाले होते. मात्र, आता काही तांत्रिक कारण असेल, त्यामुळे अपक्षांना मंत्रीपद देण्यात आले नाही. कधी कधी दोन पावलं मागे यावं लागतं. त्यामुळे मी अजूनही त्यांच्या शब्दावर विश्वास ठेवतो आहे, अशी प्रतिक्रिया बच्चू कडू यांनी दिली आहे.
मुख्यमंत्री एकनाथ शिंदे यांनी सह्याद्री अतिथीगृहावर आमदारांची बैठक बोलावली आहे. या बैठकीसाठी सर्व आमदारांना हजर राहण्याचे आदेश देण्यात आले आहेत. या बैठकीला सुरुवात झाली असून आमदार पोहोचले आहेत.
एकनाथ शिंदे आम्हाला जे मंत्री शपथ घेतील त्यांची नावं सांगतील. एकनाथ शिंदे जो काही निर्णय घेतील तो आम्हाला मान्य असेल असं शंभूराज देसाई यांनी सांगितलं आहे. टीईटी घोटाळ्यामुळे अडचणीत आलेल्या अब्दुल सत्तार यांना मंत्रिमंडळात स्थान मिळणार की नाही याबद्दल विचारलं असता, आपल्याला जास्त माहिती नसल्याचं ते म्हणाले आहेत.
* सर्वोच्च न्यायालय आणि निवडणूक आयोगापुढील कायदेशीर प्रश्न संपुष्टात येईपर्यंत मंत्रिमंडळाचा पूर्ण विस्तार करू नये, असे भाजप आणि मुख्यमंत्री शिंदे यांनी ठरविले आहे.
* त्यामुळे पहिल्या टप्प्यात भाजपच्या १२-१३ आणि शिंदे गटाच्या ९-१० मंत्र्यांचा मंत्रिमंडळात समावेश होण्याची शक्यता आहे. भाजपच्या वाटय़ाला एकूण २४ तर शिंदे गटाला १८ जागा मिळण्याची शक्यता आहे.
* पण, मंगळवारच्या विस्तारानंतर काही महिन्यांनी उर्वरित जागा भरल्या जातील. तोपर्यंत भाजप आणि विशेषत: शिंदे गटातील इच्छुकांना मंत्रिपदाच्या आशेवर ठेवण्यात येईल, असे दिसते.
फडणवीस यांनी पक्षश्रेष्ठींशी चर्चा करून मंत्र्यांची यादी निश्चित केली असून, या नेत्यांना दूरध्वनीवरुन निरोप देण्याचे काम दिवसभर सुरू होते. भाजपकडून अतुल सावे, गणेश नाईक, चंद्रशेखर बावनकुळे यांचाही समावेश करण्याबाबत विचारविनिमय सुरू होता. मुंबई-ठाण्यातील नेत्यांना सोमवारी रात्री उशिरा निरोप देण्यात येत होते. अ‍ॅड. आशिष शेलार यांना पुढील काळात भाजप प्रदेशाध्यक्षपदाची जबाबदारी दिली जाणार की त्यांचा मंत्रिमंडळात समावेश होणार, याविषयी राजकीय वर्तुळात चर्चा सुरू आहे.