नागपूर : राज्यातील शेतकऱ्यांच्या संपूर्ण कर्जमुक्तीसाठी नागपुरात सुरू असलेल्या बच्चू कडू यांच्या नेतृत्वाखालील मोर्चा आणि ठिय्या आंदोलनाला अखेर यश लाभले आहे. मंगळवारपासून सुरू असलेल्या या आंदोलनाची सांगता काल रात्री मुंबईत मुख्यमंत्री देवेंद्र फडणवीस यांच्यासोबत झालेल्या चर्चेनंतर झाली. या चर्चेत मुख्यमंत्री फडणवीस यांनी ३० जूनपर्यंत राज्यातील सर्व शेतकऱ्यांची संपूर्ण कर्जमाफी करण्यात येईल, असे आश्वासन दिले. त्यामुळे शेतकऱ्यांच्या संघर्षाला अखेर यश आले असून या आंदोलनाचा विजय नागपूरमध्ये आज जल्लोषात साजरा होणार आहे.
आज बच्चू कडू, राजू शेट्टी, महादेव जानकर, अजित नवले आणि अॅड. वामनराव चटप हे नेते मुंबईहून नागपूरला परत येत आहेत. त्यांच्यासोबत राज्य सरकारचे शिष्टमंडळही येणार आहे. त्यामुळे नागपूर विमानतळ परिसरात आणि आंदोलन स्थळी पोलिसांकडून कडेकोट सुरक्षा व्यवस्था करण्यात आली आहे.
दरम्यान, मंगळवारपासून नागपूर-हैदराबाद राष्ट्रीय महामार्गावर आंदोलन सुरू असल्याने वाहतूक ठप्प झाली होती. या संदर्भात बेलतरोडी पोलीस ठाण्यात बच्चू कडू आणि इतर सुमारे दोन हजार आंदोलनकर्त्यांविरुद्ध गुन्हे दाखल करण्यात आले आहेत. तरीही शेतकरी वर्गाने आंदोलन मागे घेतले असून आता या विजयाचा आनंद साजरा करण्याची तयारी सुरू आहे.
शेतकऱ्यांच्या दीर्घकाळ प्रलंबित असलेल्या कर्जमाफीच्या मागणीला अखेर यश मिळाल्याने ग्रामीण भागात उत्साहाचे वातावरण आहे. राज्य सरकारकडून दिलेले आश्वासन वेळेत पूर्ण व्हावे, अशी अपेक्षा शेतकरी संघटनांनी व्यक्त केली आहे. नागपूरमध्ये आज संध्याकाळी विजय उत्सवाचे आयोजन करण्यात आले असून हजारो शेतकरी त्यात सहभागी होणार आहेत.
नागपूरात आज शेतकऱ्यांचा जल्लोष पाहायला मिळात आहे. बच्चू कडू यांच्या नेतृत्वाखालील शेतकरी आंदोलनाला अखेर यश लाभले असून राज्य सरकारने ३० जूनपर्यंत संपूर्ण कर्जमाफीची घोषणा केली आहे. या विजयाचा आनंद साजरा करण्यासाठी नागपूरात “विजय उत्सव” आयोजित करण्यात आला आहे. बच्चू कडू, राजू शेट्टी, महादेव जानकर आणि इतर नेते आज नागपूरला परत येत असून त्यांच्या स्वागतासाठी मोठी गर्दी जमली आहे. पोलिसांनी कडेकोट सुरक्षा व्यवस्था केली असून “बच्चू कडू यांचा विजय असो”च्या घोषणा संपूर्ण शहरभर घुमत आहेत. शेतकऱ्यांच्या चेहऱ्यावर आज खरा दिलासा आणि आनंद झळकतो आहे.