नागपूर: महात्मा जोतिबा फुले यांनी संपूर्ण आयुष्य धार्मिक रूढी, परंपरा आणि कर्मकांडाच्या विरोधात लढा दिला. मात्र त्यांच्याच नावाने असलेल्या महात्मा जोतिबा फुले संशोधन व प्रशिक्षण संस्थेच्या (महाज्योती) नवीन इमारतीचे भूमिपूजन वेदोक्त मंत्रोच्चाराने करण्यात आले. या कृतीचा आता सामाजिक व ओबीसी संघटनांकडून निषेध करण्यात येत आहे.

क्रांतिसूर्य महात्मा जोतिबा फुले व क्रांतिज्योती सावित्रीबाई फुले यांच्या विचारकार्याचा वसा चालवण्यासाठी, त्यांच्या विचारातला सुशिक्षित समाज निर्माण करण्यासाठी राज्य शासनाने महाराष्ट्रातील इतर मागास वर्ग, विमुक्त जाती-भटक्या जमाती व विशेष मागास प्रवर्गाच्या शैक्षणिक, आर्थिक, सामाजिक विकासासाठी महात्मा जोतिबा फुले संशोधन व प्रशिक्षण संस्था (महाज्योती) स्थापन केल्याची माहिती त्यांच्या संकेतस्थळावर देण्यात आली आहे. मात्र भूमिपूजन सोहळ्यातून याच विचारांना फाटा देण्यात आल्याचा आता आरोप करण्यात येत आहे.

महाज्योतीच्या नवीन इमारतीचे रविवारी मुख्यमंत्री देवेंद्र फडणवीस आणि महसूलमंत्री चंद्रशेखर बावनकुळे यांच्या हस्ते भूमिपूजन झाले. रीतसर पुजारी बोलावून मंत्रोपचार पद्धतीने हा कार्यक्रम पार पडला. यासंदर्भातील छायाचित्र आणि माहिती समोर येताच सामाजिक संघटनांकडून त्यावर आक्षेप घेण्यात येत आहे. ओबीसी युवा अधिकार मंचचे मुख्य संयोजक उमेश कोर्राम यांनी या प्रकारचा तीव्र निषेध केला. महात्मा फुले यांनी कर्मकांडाचा कायम विरोध केला व सार्वजनिक सत्यधर्माच्या माध्यमातून बहुजन समाजाने यापासून दूर जावे, असा संदेश दिला. पण त्यांच्या विचारावर चालणारी संस्थाच कर्मकांडाला पाठबळ देत असेल तर हे संयुक्तिक नाही. यातून येणाऱ्या पिढीला आम्ही कुठला संदेश देतो, याचा प्रशासनाने विचार करावा, असेही कोर्राम म्हणाले.

हेही वाचा

‘नकोच मध्यस्थी देव आणि भक्तांमध्ये’ असे सांगणाऱ्या महात्मा फुले यांच्या नावाने असणाऱ्या संस्थेच्या नवीन इमारतीच्या भूमिपूजन कार्यक्रमातील मंत्रोपचार म्हणजे या विचारवंताने आयुष्यभर केलेले प्रबोधन आणि त्यांचा इतिहास मिटवण्याचा प्रयत्न आहे.- अतुल लोंढे, मुख्य प्रवक्ते, प्रदेश काँग्रेस</strong>

इमारतीचे बांधकाम नागपूर सुधार प्रन्यास करणार असून भूमिपूजन कार्यक्रमाची संपूर्ण व्यवस्था त्यांच्याकडे होती. त्यांनीच आखलेल्या रूपरेषेनुसार हा कार्यक्रम झाला. विद्यार्थ्यांचे सत्कार आणि इतर कामे आमच्याकडे होती.- मिलिंद नारिंगे, व्यवस्थापकीय संचालक, महाज्योती