चंद्रपूर :मुख्यमंत्री देवेंद्र फडणवीस यांच्या मंत्रिमंडळात स्थान मिळाले नसले तरी माजी मंत्री आमदार सुधीर मुनगंटीवार यांचे कामाचा धडाका त्याच गतीने सुरू आहे. “उघड दार देवा आता उघड दार देवा” ही भजन गाऊन मुनगंटीवार यांनी श्रोत्यांना मंत्रमुग्ध केले आहे तसेच देवालाही साकडे घातले आहे.

भजनातून समाजात श्रद्धा, संस्कार आणि एकतेचा प्रकाश जागविण्याच्या उद्देशाने राज्याचे माजी वने, सांस्कृतिक कार्य आणि मत्स्यव्यवसाय मंत्री आ. सुधीर मुनगंटीवार यांच्या पुढाकारातून बल्लारपूर शहर आणि ग्रामीण भागात भजनसाहित्य वाटपाचा उपक्रम राबविण्यात आला. तुकाराम सभागृह येथे झालेल्या या कार्यक्रमात “भजन ही मनाची साधना असून त्यातून चित्तशांती आणि समाधान लाभते,” असा भाव मुनगंटीवार यांनी व्यक्त केला. तसेच उघड दार देवा आता उघड दार देवा हे भजन गाऊन निवडणुकीत दिलेल्या आश्वासनाची पूर्तता करताना १८० भजन मंडळांना साहित्य वितरणाचा तिसरा टप्पा यशस्वीपणे पूर्ण झाल्याचा आनंद होत असल्याचेही आ. मुनगंटीवार यांनी नमूद केले.

बल्लारपूर येथील तुकाराम सभागृह येथे बल्लारपूर शहर व ग्रामीण भागातील भजन मंडळांना भजन साहित्य वितरणाचा कार्यक्रम आयोजित करण्यात आला. त्यावेळी आ. मुनगंटीवार बोलत होते. यावेळी वनविकास मंडळाचे माजी अध्यक्ष चंदनसिंह चंदेल, भाजपा जिल्हाध्यक्ष हरीश शर्मा, शहर अध्यक्ष रणंजय सिंग, रामपाल सिंग, पिंटू देऊळकर, निलेश खरबडे, किशोर पंदिलवार, श्रीनिवास जंगमवार, द्विवेदी, रेणुकाताई दुधे, वैशालीताई जोशी, विद्याताई देवाळकर, समीर केने, काशी सिंग, मनीष पांडे, वैशालीताई बुद्धलवार आदींची उपस्थिती होती.

हेही वाचा

आमदार सुधीर मुनगंटीवार म्हणाले, सर्वांच्या आशीर्वादाने व सहकार्याने मतदार संघात कार्य करण्याची संधी मिळाली. निवडणूक काळात दिलेला शब्द पूर्ण करत १८० भजन मंडळांना साहित्य वाटपाचा तिसरा टप्पा यशस्वीरीत्या आज पार पडला. याचे मला कमालीचे आत्मिक समाधान आहे. राष्ट्रसंत तुकडोजी महाराजांनी दाखविलेला जीवनमार्ग सदैव प्रेरणादायी आहे. नागपूर विद्यापीठाला त्यांचे नाव देण्याचे सौभाग्य आणि मोझरी येथील त्यांच्या ट्रस्टचा उपाध्यक्ष म्हणून कार्य करण्याची संधी लाभली, ही माझ्यासाठी अभिमानाची बाब आहे, असेही आ. मुनगंटीवार म्हणाले.भौतिक सुविधा शरीराची साधना घडवतात, पण मन आणि चित्ताचा खरा आनंद भजनातूनच प्राप्त होतो. भजन साहित्य ही मनाच्या समाधानाची एक समृद्ध बँक आहे. भजनाची राजधानी म्हणून मोझरी ओळखली जावी अशी इच्छा राष्ट्रसंतांच्या चरणी नतमस्तक होऊन व्यक्त केली. मनाचे आरोग्य उत्तम ठेवण्यासाठी भजन अत्यंत महत्त्वाचे आहे. भजनाच्या माध्यमातून चित्ताला समाधान मिळते आणि चेहऱ्यावर आनंदाचे हास्य फुलते. भजन साहित्य हे त्याचे सर्वांत मोठे माध्यम आहे, असेही आमदार मुनगंटीवार म्हणाले. यावेळी आमदार मुनगंटीवार यांच्या हस्ते निवडणूक काळात दिलेल्या आश्वासनाची पूर्तता करत भजन मंडळांना भजन साहित्याचे वितरण करण्यात आले.

देहाची तिजोरी, भक्तीचाच ठेवा !

बल्लारपूर येथील तुकाराम सभागृहात भजनाच्या स्वरांनी भारलेला क्षण, भक्तीचा साक्षात्कार करून गेला. बल्लारपूर शहर व ग्रामीण भागातील भजन मंडळांना भजन साहित्य वाटपाचा हा सोहळा म्हणजे भक्ती, संस्कार आणि संवेदनशीलतेचा संगम होता.कार्यक्रमादरम्यान आमदार सुधीर मुनगंटीवार यांनी “देहाची तिजोरी, भक्तीचाच ठेवा” हे भजन गायले आणि सभागृहात श्रद्धेची तरल लहर पसरली. त्यांच्या आवाजातील भाव, भक्ती आणि शब्दांतील भावना मनाला स्पर्शून गेली. भजनसाहित्याचे वाटप हे केवळ साहित्यदान नव्हे, तर आत्मिक उन्नतीचा सोहळा होता. जो भक्तीची परंपरा, वचनपूर्तीचा निर्धार आणि समाजाशी असलेला हृदयस्पर्शी संवाद नव्याने उजळून गेला.