धुळे : दोंडाईचा–वरवाडे नगरपरिषदेच्या निवडणुकीत भारतीय जनता पक्षाने पहिल्याच टप्प्यात मजबूत कामगिरी करत मोठा राजकीय दिलासा मिळवला आहे. पालकमंत्री जयकुमार रावल यांच्या नेतृत्वाखाली लढविल्या जाणाऱ्या या निवडणुकीत त्यांच्या मातोश्री आणि माजी नगराध्यक्षा नयनकुंवर रावल यांची नगराध्यक्षपदी बिनविरोध निवड जाहीर झाली आहे. विरोधी महाविकास आघाडीच्या शरयु एकनाथ भावसार यांचा अर्ज छाननीदरम्यान बाद झाल्याने हा निकाल निश्चित झाला.
नगराध्यक्षपदाबरोबरच भाजपने नगरसेवक पदासाठी उभे केलेले सातही उमेदवार बिनविरोध निवडून आले आहेत. २६ सदस्यीय नगरपरिषदेत भाजपच्या उमेदवारांचे अर्ज कोणतीही हरकत न लागता वैध ठरले, तर विरोधी उमेदवारांचे अर्ज तांत्रिक आणि कायदेशीर कारणांमुळे बाद झाल्याचे प्रशासनाने स्पष्ट केले. रविना महेश कुकरेजा, सरला छोटू सोनवणे, चतूर जिभाऊ पाटील, राणी राकेश अग्रवाल, वैशाली प्रविण महाजन, निखिलकुमार रविंद्र जाधव आणि भरतरी पुंडलिक ठाकूर हे उमेदवार निवडणूकपूर्वीच विजयी ठरले असून शहरात भाजप कार्यकर्त्यांचा जल्लोष सुरू आहे.
या निकालामुळे खान्देशात भाजपची विजयी सुरूवात झाल्याचे राजकीय वर्तुळात मानले जात आहे. यंदाच्या निवडणुकीत महायुतीत एकमत न झाल्याने मित्रपक्षांनी सर्व ठिकाणी उमेदवार उभे केले; तरीसुद्धा दोंडाईचा–वरवाडे येथे निकाल पूर्णपणे भाजपाच्या बाजूने लागला आहे. त्यामुळे स्थानिक राजकारणात भाजपची पकड अधिक मजबूत झाल्याचे दिसत आहे.
दोंडाईचा शहरातील राजकीय समीकरणात अलीकडे मोठे बदल झाले. माजी मंत्री डॉ. हेमंत देशमुख आणि माजी नगराध्यक्ष डॉ. रवींद्र देशमुख यांनी पालकमंत्री जयकुमार रावल यांच्या विकास धोरणाला पाठिंबा देत नुकतेच भाजपात प्रवेश केला. त्यामुळे शहरात भाजपसमोर ठोस विरोधक उरले नाहीत आणि निवडणूक रावल यांच्या गटासाठी तुलनेने सोपी झाली असल्याचे मानले जाते. अर्ज छाननीच्या दिवशीच सात प्रभागांत बिनविरोध विजय निश्चित झाल्याने भाजपची निवडणूक रणनीती, संघटनशक्ती आणि नियोजन पुन्हा अधोरेखित झाले आहे, या उमेदवारांच्या विजयाची औपचारीक घोषणा तेवढी बाकी आहे अशी माहिती पालकमंत्री रावल यांचे स्वीय सहायक दिनेश ठाकरे यांनी दिली. दोंडाईचा–वरवाडे येथे भाजपने मिळवलेले हे प्रारंभीचे यश आगामी निकालासाठी दिशा दर्शवणारे ठरत असून, स्थानिक पातळीवर पुढील राजकीय वळणाची सुरुवात झाल्याचे संकेत मिळत आहेत.
दरम्यान, जिल्ह्यातील इतर तीन स्थानिक स्वराज्य संस्थांमध्येही निवडणूक प्रक्रिया तितक्याच वेगाने सुरू आहे. शिरपूर–वरवाडे, शिंदखेडा आणि दोंडाईचा नगरपंचायतीत उमेदवारी अर्जांची छाननी पूर्ण झाली असून काही ठिकाणी स्वतंत्र उमेदवारांनी मोठ्या प्रमाणात अर्ज दाखल केले आहेत. त्यामुळे या भागातील लढती अधिक चुरशीच्या होण्याची शक्यता राजकीय विश्लेषक व्यक्त करत आहेत.
शिरपूर–वरवाडे आणि शिंदखेडा येथे भाजप, राष्ट्रवादी काँग्रेस (शरद पवार गट), काँग्रेस आणि शिवसेना (ठाकरे गट) यांच्यात बहुकोनी संघर्ष निर्माण झाला आहे. अनेक प्रभागांत स्थानिक पातळीवरील गटबाजी, नातेवाईक राजकारण आणि विकासाच्या मुद्द्यांवरून स्पर्धा अधिक तीव्र झाली असून दोंडाईचा–वरवाडेच्या बिनविरोध निकालानंतर उर्वरित तीन ठिकाणचे निकाल आता अधिक उत्सुकता वाढवणारे ठरणार आहेत.