फडणवीस यांचे संदीप नाईकांना आव्हान, खैरणे एमआयडीसी कार्यालयात पत्रकार परिषद

कल्याण, डोंबिवली परिसरांतील सभा आटोपून मंगळवारी रात्री देवेंद्र फडणवीस गणेश नाईक यांच्या खैरणे एमआयडीसी येथील कार्यालयात आले. या वेळी त्यांनी तातडीची पत्रकार परिषद बोलावली. गणेश नाईक यांच्या उपस्थितीतच त्यांनी संदीप नाईकांना आव्हान देत मंदा म्हात्रे यांच्या विजयाची खात्री दिली. महाविकास आघाडीतील तिन्ही पक्षांत भांडण सुरू झाले आहे. महाराष्ट्रात १०० टक्के भाजप निवडून येणार असल्याचा विश्वास त्यांनी या वेळी व्यक्त केला. बेलापूर मतदारसंघात मंदा म्हात्रे विजयाची हॅटट्रीक करतील असा विश्वास फडणवीस यांनी व्यक्त केला. गणेश नाईक हे ऐरोली मतदारसंघात निवडणूक लढवत असून नाईक हे त्यांच्या मतांचा विक्रम यंदा मोडतील, असा दावाही त्यांनी केला. राज्यभरात झालेल्या सभांमधून नागरिकांनी महायुतीला निवडून देण्याचा निश्चय केला असून कोणीही कोणत्याही प्रकारची आव्हाने देवोत, महाराष्ट्रात १०० टक्के महायुतीचीच सत्ता येणार असल्याचा विश्वास व्यक्त केला. नवी मुंबई शहरात गणेश नाईक गेली अनेक वर्षे सातत्याने निवडून येत असून नवी मुंबई घडवण्यात त्यांचा मोलाचा वाटा आहे.

हेही वाचा – हवा प्रदूषणाचा मुद्दा निवडणुकीतून गायब? उरणमधील वाढते हवा प्रदूषण, तापमान आणि आर्द्रतेचा नागरिकांच्या शरीरावर परिणाम

हेही वाचा – ऐरोलीतील बंडखोरांना शिंदे गटाचे अभय? बेलापुरात कारवाई, ऐरोलीत आस्ते कदम

अमित शहांची सभा

बेलापूर विधानसभा मतदारसंघात येत्या १८ तारखेला गृहमंत्री अमित शहा यांची सभा होईल, अशी माहिती या वेळी पक्षाचे नवी मुंबई जिल्हाध्यक्ष रामचंद्र घरत यांनी दिली. नेरुळ येथील रामलीला मैदानात या सभेचे आयोजन करण्यात आले आहे, असे त्यांनी सांगितले.