Photos : कुणाला धमकीवजा फोन तर कोणाच्या घराबाहेर बॉम्ब…; ‘या’ बॉलिवूड सेलिब्रिटींनाही मिळाली होती जीवे मारण्याची धमकी

बॉलिवूड अभिनेता सलमान खान आणि त्याचे वडील सलीम खान यांना पत्राद्वारे जीवे मारण्याची धमकी देण्यात आली आहे. ‘सलमान खानचा सिद्धू मुसेवाला करून टाकू’ असे या पत्रात लिहण्यात आले होते. या पत्रानंतर सलमान खानच्या सुरक्षेत वाढ करण्यात आली आहे. परंतु, या आधीही २०१८ मध्ये सलमानला अशाचप्रकारे मारण्याची धमकी देण्यात आली होती. मुंबई पोलिसांना आलेल्या फोनवर 'सलमान खानला मारले जाईल' असे सांगण्यात आले होते. केवळ सलमान खानच नाही तर बॉलिवूडमधील अशा अनेक सेलिब्रिटींना जीवे मारण्याची धमकी देण्यात आली होती. बॉलिवूड अभिनेत्री कंगना रणौतलादेखील मारण्याची धमकी देण्यात आली होती. कंगनाने याबद्दल पोस्ट करत मी अशा धमक्यांना घाबरत नसल्याचं सांगितलं होतं. याविरुद्ध तिने हिमाचल प्रदेशातील पोलिस स्टेशनमध्ये तक्रारदेखील दाखल केली होती. बिग बी अमिताभ बच्चन यांच्या घराबाहेर बॉम्ब ठेवण्यात आला असल्याचा फोन मुंबई पोलिसांना आला होता. किंग खान शाहरुखला गेली अनेक वर्ष जीवे मारण्याची धमकी देण्यात येत आहे. शाहरुखच्या मन्नतबाहेरदेखील बॉम्ब ठेवण्यात आल्याचा फोन करण्यात आला होता. 'सत्यमेव जयते' या शोच्या पहिल्या सीझननंतर अभिनेता आमिर खानला देखील धमकीवजा फोन आला होता. एका गॅंगस्टरने बॉलिवूड गायक अरिजित सिंगला जीवे मारण्याची धमकी दिली होती. अरिजितच्या लाइव्ह कॉन्सर्टसाठी कमी पैसे आकारण्यात यावे, यासाठी गॅंगस्टरने फोनद्वारे धमकी दिली होती. अरिजितप्रमाणेच लोकप्रिय गायक सोनू निगमलाही गॅंगस्टरकडून धमकीचा फोन आला होता. बॉलिवूड निर्माता, दिग्दर्शक करण जोहरने एका मुलाखतीदरम्यान जीवे मारण्याची धमकी देण्यात आल्याचा खुलासा केला होता. बॉलिवूड दिग्दर्शक राकेश रोशन यांना देखील धमकीवजा फोन आला होता. चित्रपटाच्या यशानंतर अधिक पैसे देण्याची मागणी गॅंगस्टरकडून करण्यात आली होती. बॉलिवूड अभिनेता अक्षय कुमारला देखील जीवे मारण्याची धमकी देण्यात आली होती. गॅंगस्टर रवी पुजारीने अक्षय कुमारला धमकी दिल्यानंतर त्याच्या घराबाहेर सुरक्षा वाढविण्यात आली होती. (सर्व फोटो : इंडियन एक्सप्रेस)