Photos: आर्यन खानला NCB कडून दिलासा मिळताच शाहरुखच्या मन्नतबाहेर चाहत्यांची गर्दी

बॉलिवूडमधील सुप्रसिद्ध अभिनेता शाहरुख खानचा मुलगा आर्यन खानला एनसीबीने (NCB) मुंबई क्रुज ड्रग्ज प्रकरणात क्लिन चीट दिली आहे. आर्यन खानला क्लिन चीट मिळाल्यानंतर चाहत्यांनी शाहरुख खानच्या मुंबईतील निवासस्थानाबाहेर एकच गर्दी केलेली पाहायला मिळाली. ‘एनसीबी’ने २ ऑक्टोबर २०२१ रोजी मुंबईहून गोव्याला जाणाऱ्या कार्डेलिया क्रूझवर छापा टाकला होता. यावेळी पाच ग्रॅम मेफ्रेडॉन (एमडी), १३ ग्रॅम कोकेन, २१ ग्रॅम चरस, एमडीएमएच्या २२ गोळ्या व एक लाख ३३ हजारांची रोकड जप्त करण्यात आली होती. या प्रकरणी ‘एनसीबी’ने आर्यन खानसह आठ जणांना चौकशीसाठी ताब्यात घेतले होते. आरोपींविरोधात अमली पदार्थ प्रतिबंधक कायद्यानुसार गुन्हा दाखल करण्यात आला होता. आर्यन खानला अटक करून चौकशी देखील करण्यात आली होती. मात्र, चौकशीत ६ आरोपींविरोधात पुरावे मिळाले नसल्याचं एनसीबीने जारी केलेल्या प्रेस नोटमध्ये सांगितलं आहे. त्यामुळे आरोपत्रातून आर्यन खानसह ६ जणांची नावे एनसीबीकडून वगळण्यात आली आहेत. एनसीबीने दिलेल्या माहितीनुसार, आर्यन खानकडे ड्रग्ज सापडले नव्हते. शाहरुखच्या 'मन्नत'बाहेर आर्यन खानला पाहण्यासाठी चाहत्यांची गर्दी. (सर्व फोटो : प्रदीप दास, इंडियन एक्सप्रेस)