पुणे : आयुष्यात काही क्षण असे येतात, जे कधीही विसरता येत नाही. मात्र तुमच्या पाठीशी सक्षम आणि खंबीर नेतृत्व असेल तर कोणत्याही संकटातून बाहेर पडता येते. याचा अनुभव पुणे शहर भाजपचे माजी शहराध्यक्ष आणि माजी आमदार जगदीश मुळीक यांनी सोशल मीडियावर पोस्ट केली आहे. राज्याचे मुख्यमंत्री देवेंद्र फडणवीस यांनी केलेल्या मदतीची माहिती मुळीक यांनी यामध्ये सविस्तर लिहिली आहे. ‘भावाप्रमाणे प्रेम करणारे देवाभाऊ!’ अशा आशयाची ही पोस्ट सध्या सर्वत्र व्हायरल होत आहे.
वडगावशेरी विधानसभा मतदारसंघाचे माजी आमदार आणि भाजपचे माजी शहराध्यक्ष म्हणून जबाबदारी पार पाडलेल्या जगदीश मुळीक यांना आरोग्याची समस्या जाणवली. अचानक निर्माण झालेल्या परिस्थितीतून पक्षाचे वरिष्ठ नेते आणि राज्याचे मुख्यमंत्री देवेंद्र फडणवीस यांनी कशी मदत केली. याची सविस्तर माहिती आपल्या पोस्ट मध्ये लिहिली आहे. भावाप्रमाणे प्रेम करणारे देवाभाऊ! अशी ही पोस्ट असून सध्या ही पोस्ट सोशल मीडियावर व्हायरल होत आहे.
माजी आमदार जगदीश मुळीक यांनी सोशल मिडियावर टाकलेल्या पोस्टमध्ये म्हटले आहे. ‘ कधी कधी आयुष्यात काही क्षण असे येतात, जे विसरता येत नाहीत. अलीकडे मी माझी सीटी अँजिओग्राफी करून घेतली होती. त्याचा रिपोर्ट चुकीचा आल्याने पुण्यातील डॉक्टरांनी काळजी व्यक्त केली. या अचानक उद्भवलेल्या परिस्थितीत मी तात्काळ आपल्या महाराष्ट्राचे लाडके मुख्यमंत्री देवेंद्रजी फडणवीस (देवाभाऊ) यांना फोन केला.
फक्त तीन मिनिटांतच देवाभाऊंनी स्वतः डॉक्टरांशी संपर्क साधून मला परत फोन केला आणि शांतपणे सांगितले, “जगदीश, उद्या दुपारी चार वाजता डॉ. रमाकांत पांडा यांना भेट, मग पुढचं आपण ठरवू.” दुसऱ्या दिवशी मी डॉ. पांडा यांना भेटलो. त्यांनी तपासणी करून तात्काळ अँजिओग्राफी केली आणि परिस्थिती लक्षात घेऊन लगेचच हॉस्पिटलमध्ये दाखल करून घेतले. पुढच्या दिवशीच माझी बायपास सर्जरी करण्यात आली. हे सर्व इतकं अचानक आणि तातडीचं झालं की कोणाशी काही बोलण्यासही वेळ मिळाला नाही. त्या संपूर्ण काळात माझे कुटुंबीय आणि मित्रमंडळी माझ्यासोबत ठाम उभे राहिले.
या सर्व प्रसंगात देवाभाऊंनी ज्या प्रकारे माझी काळजी घेतली, ती खरंच लहान भावासारखी होती. मुख्यमंत्री म्हणून नव्हे, तर एक संवेदनशील माणूस म्हणून त्यांनी दाखवलेली तत्परता, आत्मीयता आणि जिव्हाळा मी आयुष्यभर विसरणार नाही. त्यांनी डॉक्टरांशी स्वतः संवाद साधला, उपचाराची तातडीने व्यवस्था केली आणि आज, शस्त्रक्रियेनंतर काही दिवसांनी, स्वतः भेट द्यायलाही आले. त्यांच्या या भेटीतून मिळालं ते फक्त आशीर्वाद नव्हे, तर मानसिक बळ आणि आत्मविश्वासाचा अनमोल आधार.
देवेंद्र फडणवीस हे फक्त नेता नाहीत, तर कार्यकर्त्यांना भावासारखे समजणारे, त्यांच्या सुखदुःखात सहभागी होणारे संवेदनशील मुख्यमंत्री आहेत. महाराष्ट्राला अशाच नेतृत्वाची गरज होती आणि ते नेतृत्व आपल्याला देवभाऊंच्या रूपाने लाभले आहे.
या काळात माझ्या उपचारासाठी तत्परतेने मदत केलेल्या डॉ. रमाकांत पांडा तसेच त्यांची संपूर्ण टीम, डॉ. ज्ञानेश गवारे आणि डॉ. अभिजित लोढा यांचे मी मनःपूर्वक आभार मानतो. त्यांच्या कौशल्यपूर्ण सेवेमुळे आणि देवभाऊंच्या संवेदनशील तत्परतेमुळे आज मी पुन्हा एकदा बळकट उभा आहे. माझ्या कुटुंबीयांचे, मित्रांचे, कार्यकर्त्यांचे आणि सर्व जनतेचे प्रेम, साथ आणि आशीर्वाद याबद्दल मी अंतःकरणपूर्वक आभारी आहे.
सध्या माझी तब्येत सुधारते आहे. काही दिवस विश्रांती घेतल्यानंतर मी लवकरच पुणेकरांच्या सेवेत पुन्हा रुजू होणार आहे, असा विश्वासही मुळीक यांनी पोस्टमध्ये व्यक्त केला आहे.