एमपीएससीकडून सहायक कक्ष अधिकारी पदाच्या परीक्षेचा निकाल जाहीर; अवधूर दरेकर राज्यात प्रथम

पुणे : महाराष्ट्र लोकसेवा आयोगातर्फे (एमपीएससी) घेण्यात आलेल्या महाराष्ट्र अराजपत्रित गट ब सेवा मुख्य परीक्षा २०२३ या परीक्षेतील कक्ष अधिकारी संवर्गाच्या परीक्षेचा अंतिम निकाल जाहीर करण्यात आला. या परीक्षेत रत्नागिरी जिल्ह्यातील अवधूत दरेकर यांनी राज्यात प्रथम क्रमांक पटकावला. मुलींमध्ये सातारा जिल्ह्यातील सोनाली भिसे यांनी प्रथम क्रमांक मिळवला असून, मागासवर्गीय प्रवर्गातून यवतमाळ जिल्ह्यातील गजानन राठोड याने प्रथम क्रमांक पटकावला आहे.

एमपीएससीने प्रसिद्धीपत्रकाद्वारे ही माहिती दिली. एमपीएससीतर्फे ५ नोव्हेंबर २०२३ रोजी परीक्षा घेण्यात आली होती. परीक्षेत सहायक कक्ष अधिकारी या संवर्गाच्या एकूण १६४ पदांचा समावेश होता. एमपीएससीतर्फे न्यायालयाचे आदेश, तसेच संबंधित उमेदवारांनी अर्जात केलेल्या दाव्यांच्या अनुषंगाने त्यांची पात्रता शासन स्तरावर मूळ प्रमाणपत्रावरून तपासण्याच्या आधीन राहून हा निकाल जाहीर केला आहे. उमेदवारांच्या माहितीसाठी या परीक्षेचा अंतिम निकाल व प्रत्येक प्रवर्गातील शिफारस पात्र ठरलेल्या शेवटच्या उमेदवारांचे गुण आयोगाच्या संकेतस्थळावर प्रसिद्ध करण्यात आले आहेत. खेळाडू आणि इतर वर्गवारीमध्ये शिफारस पात्र ठरणाऱ्या उमेदवारांना निकालामध्ये तात्पुरते समाविष्ट करण्यात आलेआहे. या उमेदवारांच्या प्रमाणपत्राची पडताळणी शासनाकडून करण्याच्या आधीन राहून ही शिफारस केली गेली आहे.

आणखी वाचा-पुणे : ताटात हात घातल्याने तरुणाचा खून, धायरीतील घटना; पाचजणांविरुद्ध गुन्हा

दरम्‍यान, अंतिम निकालात शिफारस पात्र न ठरलेल्या उमेदवारांना त्यांच्या उत्तर पत्रिकेतील गुणांची पडताळणी करायची असल्यास संबंधित उमेदवारांनी गुणपत्रके ऑनलाइन खात्यात (प्रोफाइल) पाठवण्याच्या दिनांकापासून दहा दिवसात आयोगाकडे ऑनलाइन पद्धतीने अर्ज करणे आवश्यक आहे, असेही स्‍पष्ट करण्यात आले.