Devendra Fadnavis : “अकेला देवेंद्र क्या करेगा? पण त्यांना त्यावेळी…” सुप्रिया सुळेंच्या टीकेवर फडणवीसांचा तीन वर्षांनी पलटवार

सुप्रिया ताईंचे म्हणणे खरे होते…

या सत्कार समारंभात बोलताना मुख्यमंत्री देवेंद्र फडणवीस म्हणाले, “आपण सगळे कामाला लागलो आणि हा महाविजय मिळाला. आज सत्कार जरी मंचावरील लोकांचा होत असला तरी तो तुमच्या सर्वांच्या वतीने स्वीकारत आहोत. भाजपाच्या असंख्य कार्यकर्त्यांच्या वतीने आम्ही स्वीकारतोय. कारण कार्यकर्त्यांचे प्रतिक म्हणून आम्ही या ठिकाणी बसलो आहोत. एकदा सुप्रिया ताई असे म्हणाल्या होत्या की, अकेला देवेंद्र क्या करेगा? सुप्रिया ताईंचे म्हणणे खरे होते. अकेले देवेंद्र की कोई औकात नही है, अकेला देवेंद्र कुछ नही कर सकता. पण त्यांना त्यावेळी माहित नव्हते देवेंद्र एकटा नाही त्याच्याबरोबर संपूर्ण भारतीय जनता पार्टी आहे.”

काय म्हणाल्या होत्या सुप्रिया सुळे?

तीन वर्षांपूर्वी एका कार्यक्रमात बारामतीच्या खासदार सुप्रिया सुळे यांनी राष्ट्रवादी काँग्रेस पक्षाच्या कार्यक्रमात मुख्यमंत्री देवेंद्र फडणवीस यांच्यावर टीका केली होती. त्यावेळी त्या म्हणाल्या होत्या की, “अकेला देवेंद्र क्या करेगा?” आज तीन वर्षांनी देवेंद्र फडणवीस यांनी सुप्रिया सुळे यांच्या या टीकेला उत्तर दिले आहे.

हे ही वाचा : “उदय सामंत हुशार, त्यांना जगभराची माहिती”; एकनाथ शिंदेंच्या आजी-माजी मंत्र्यांमध्ये जुंपली

फडणवीस पाच वर्षांनी पुन्हा मुख्यमंत्री

२०१९ मध्ये राज्यात झालेल्या विधानसभा निवडणुकीत भाजपा-शिवसेना युतीला बहुमत मिळाले होते. पण, मुख्यमंत्री पदावरून वाद झाल्याने शिवसेना बाहेर पडली आणि काँग्रेस, राष्ट्रवादी काँग्रेस व शिवसेनेचे महाविकास आघाडी निर्माण झाली. त्यानंतर सुमारे दोन वर्षांत एकनाथ शिंदे आणि ४० आमदारांनी बंड केले आणि भाजपा पुन्हा सत्तेत आली. दरम्यान त्यावेळी फडणवीस यांना मुख्यमंत्री पदाने हुलकावणी दिली होती. पुढे, अजित पवारही सुमारे ४० आमदारांबरोबर महायुती सरकारमध्ये सहभागी झाले होते. आता झालेल्या विधानसभा निवडणुकीत एकट्या भाजपाने १३२ जागा आणि महायुतीने २३७ जागा मिळवत सत्ता कायम राखली. यावेळी सर्वाधिक जागा असल्याने भाजपाच्या देवेंद्र फडणवीस यांच्या गळ्यात मुख्यमंत्री पदाची माळ पडली.