​सावंतवाडी: मनोज जरांगे-पाटील यांच्या यशस्वी आंदोलनानंतर मराठा समाजाला आरक्षण मिळालं असलं, तरी कोकणातील मराठा समाजाला याचा फायदा होणार नाही, अशी चिंता मराठा महासंघाने व्यक्त केली आहे. यामुळे, कोकणातील मराठ्यांची अवस्था ‘न घर का ना घाट का’ अशी होईल. त्यामुळे, सरकारने कोकणासाठी स्वतंत्र धोरण स्वीकारले पाहिजे, अशी मागणी मराठा महासंघाचे जिल्हाध्यक्ष ॲड. सुहास सावंत यांनी केली आहे.

​मराठा आरक्षणाच्या पुढील वाटचालीवर चर्चा करण्यासाठी सिंधुदुर्गमधील मराठा महासंघाने कुडाळ येथील मराठा हॉलमध्ये एक महत्त्वपूर्ण बैठक घेतली. या बैठकीत मराठा समाजाच्या मागण्या मान्य केल्याबद्दल मुख्यमंत्री देवेंद्र फडणवीस आणि त्यांच्या मंत्रिमंडळातील सदस्यांचे आभार मानण्यात आले. त्याचबरोबर, मनोज जरांगे-पाटील आणि मराठवाड्यातील जनतेचेही अभिनंदन करण्यात आले.

​हैदराबाद गॅझेट आणि कोकणातील मराठा

हैदराबाद गॅझेटचा वापर करून मराठवाड्यातील मराठा समाज कुणबी आरक्षणाचा लाभ घेऊ शकतो. त्याचप्रमाणे, सातारा गॅझेटची अंमलबजावणी झाल्यास पश्चिम आणि उत्तर महाराष्ट्रातील मराठा समाजाला फायदा होईल. मात्र, कोकणात अशा प्रकारचे कोणतेही गॅझेट नसल्याने कोकणातील मराठा समाजाला या आरक्षणाचा लाभ मिळणार नाही. यामुळे, त्यांना नोकरी आणि शिक्षणाच्या संधींमध्ये कोणताही फायदा होणार नाही, अशी भीती व्यक्त करण्यात आली.

हेही वाचा

​कायदेशीर वैधता आणि नोकरभरती

पूर्वी दिलेले एसईबीसी आरक्षण सर्वोच्च न्यायालयात रद्द झाले होते, त्यामुळे अनेक तरुणांना नोकऱ्या गमवाव्या लागल्या होत्या. आता पुन्हा दिलेले आरक्षण कायद्याच्या कसोटीवर टिकेल का, याबाबत शंका आहे. याच दरम्यान, सरकारने पोलीस आणि शिक्षकांसारख्या मोठ्या सरकारी नोकरभरतीची घोषणा केली आहे. जर न्यायालयाचा निर्णय विरोधात गेला, तर नव्याने नोकरी मिळालेल्या तरुणांना पुन्हा अडचणींचा सामना करावा लागू शकतो, अशी भीती व्यक्त करण्यात आली.

​कोकणातील मराठ्यांसाठी स्वतंत्र धोरणाची मागणी

​या गंभीर परिस्थितीवर तोडगा काढण्यासाठी मराठा महासंघाने काही निर्णय घेतले आहेत. कोकणातील मराठा बांधवांसाठी वेगळे धोरण असावे, अशी मागणी सरकारकडे केली जाणार आहे. त्यासाठी, कोकणातील सर्व आजी-माजी लोकप्रतिनिधींना निवेदन देण्याचा निर्णय घेण्यात आला आहे.
​या निवेदनाद्वारे, कोकणातील मराठ्यांना नोकरभरतीमध्ये ईडब्ल्यूएस (EWS) आरक्षणाचा लाभ मिळावा, अशी मागणी मुख्यमंत्री देवेंद्र फडणवीस यांच्याकडे केली जाणार आहे. ​या बैठकीला मराठा महासंघाचे जिल्हाध्यक्ष ॲड. सुहास सावंत, मनसे जिल्हाध्यक्ष धीरज परब, मराठा महासंघाचे जिल्हा सचिव वैभव जाधव, कुडाळ तालुकाध्यक्ष संतोष परब, मनोज घाटकर आणि अन्य प्रमुख कार्यकर्ते उपस्थित होते.