“मला फटकारलं, टोमणे खावे लागले…”, विशाखा सुभेदार यांनी सांगितलं ‘महाराष्ट्राची हास्यजत्रा’ सोडण्याचं खरं कारण, स्वतःची बाजू मांडत म्हणाल्या…

विशाखा सुभेदार या मराठी मनोरंजन सृष्टीतील लोकप्रिय विनोदी अभिनेत्रींपैकी एक आहेत. त्यांच्या उत्स्फूर्त आणि सहज सुंदर कामाने प्रेक्षकांना भुरळ घातली आहे. आतापर्यंत त्या ‘फु बाई फु’, ‘कॉमेडीची बुलेट ट्रेन’ अशा अनेक कार्यक्रमांमधून त्या प्रेक्षकांच्या भेटीला आल्या. गेली काही वर्षं त्या ‘महाराष्ट्राची हास्यजत्रा’ या कार्यक्रमामध्ये दिसत होत्या. या कार्यक्रमाने विशाखा सुभेदार यांना वेगळी ओळख मिळवून दिली. परंतु काही महिन्यांपूर्वी त्यांनी हा कार्यक्रम सोडला. तर त्यांनी हा कार्यक्रम का सोडला आणि या कार्यक्रमामध्ये काम करण्याचा त्यांचा अनुभव कसा होता हे सांगितलं आहे. त्या म्हणाल्या, “मी तेरा वर्षं स्किट फॉरमॅट करत आले आहे. त्यामुळे मला स्वतःला काहीतरी वेगळं करायचं होतं." "स्किट झाल्यानंतर केल्या जाणाऱ्या जजमेंटचा की आज चांगलं झालं, आज तू आणखीन चांगलं करू शकली असतीस… मला दरवेळी स्वतःला परीक्षेत उतरवायचा कंटाळ आला होता." "आपलं काम आपल्याला छान वाटलं पाहिजे." "माझ्या कामाचं परीक्षण दुसऱ्यांनी केल्यामुळे मला माझ्या कामाच्या समाधानाची पुडी बांधता येत नव्हती." "मी माझा एव्हरेस्ट चढले आहे आणि मी खूप खुश आहे की माझ्या एव्हरेस्टवर मी झेंडा रोवला आहे." " त्यामुळे मी आधी जिथे होते तिथे मी खुश होते आणि आता जिथे आहे तिथेही खूप खुश आहे.” "हास्यजत्रेत कोणी माझा अपमान करत आहे, मला योग्य वागणूक देत नाहीये अशातला काहीही भाग नाही." "हास्यजत्रेत माझे खूप लाड झाले, मला फटकारलंही गेलं, मला टोमणेही खावे लागले; जे प्रत्येक कलाकाराला खावे लागतात." "जर कलाकाराचं काम चांगलं झालं नाही तर त्याला बोलणी खावी लागतात आणि जर चांगलं झालं तर त्याची वाहवाही ते करतात. त्या प्रत्येकाचे आम्ही भुकेले असतो." "जर मी उद्या एखादं वाईट काम करत असेन आणि मला जर लोकांनी ते सांगितलं नाही तर याचा अर्थ लोक माझ्याकडे दुर्लक्ष करत आहेत आणि कलाकाराला दुर्लक्षित केलं जाणं हे त्याच्यासाठी खूप वाईट असतं." "मी खुश आहे की माझी अशी परिस्थिती नाही." "मी हास्यजत्रा म्हणूनच सोडलं कारण मी कुठे आहे हे मला तपासून पाहायचं होतं.”