पुणे : नवरात्रोत्सवात नारळाला मागणी वाढली असून, यंदा दक्षिणेकडील राज्यांत नारळाचे उत्पादन कमी झाल्याने दर तेजीत आहेत. नारळाच्या दरात १० ते १५ टक्क्यांनी वाढ झाली आहे. नवरात्रोत्सवात बाजारपेठेत दररोज तीन लाख नारळांची विक्री होत असल्याची माहिती व्यापाऱ्यांनी दिली.
नवरात्रोत्सवात विविध मंदिरात भाविकांकडून तोरण अर्पण केले जाते. तोरणासाठी नव्या नारळाच्या मागणीत वाढ झाली आहे. किरकोळ बाजारात एका नारळाची किंमत ३५ ते ५० रुपयांपर्यंत आहे. गणेशोत्सव, नवरात्रोत्सवात नारळाला उच्चांकी मागणी असते. गेल्या दोन महिन्यांपासून नारळाचे दर तेजीत आहेत. दक्षिणेकडील राज्यात नारळाची लागवड कमी झाल्याने मागणीच्या तुलनेत आवकही कमी होत आहे. तामिळनाडू, आंध्र प्रदेश, कर्नाटकात नारळाची लागवड मोठ्या प्रमाणावर केली जाते, अशी माहिती मार्केट यार्ड भूसार बाजारातील नारळ व्यापारी दीपक बोरा यांनी दिली.
उपवासाचे पदार्थ तयार करण्यासाठी नारळाचा वापर मोठ्या प्रमाणावर केला जातो. सापसोल, मद्रास या जातीच्या नारळाचे खोबरे गोड असते. त्यामुळे केटरिंग व्यावसायिक आणि उपाहारृह चालकांकडून नारळाच्या मागणीत वाढ झाली असल्याचे त्यांनी सांगितले.
फेब्रुवारीपर्यंत नारळाचे दर तेजीत
नवरात्रोत्सवामुळे देशभरातून नारळाच्या मागणीत वाढ झाली आहे. गोटा खोबऱ्याचे दर तेजीत आहेत. प्रक्रिया उद्योगांकडून नारळाला मागणी वाढली आहे. नवरात्रोत्सवात पुणे शहर परिसरात दररोज तीन लाख नारळांची विक्री होते. नवीन नारळांचा हंगाम फेब्रुवारी महिन्यात सुरू होतो. त्यामुळे पुढील चार ते पाच महिने नारळाचे दर तेजीत राहणार आहेत. – दीपक बोरा, नारळ व्यापारी, मार्केट यार्ड भुसार बाजार
नारळाचे दर (शेकडा)
- नवा नारळ – ३००० ते ३२०० रुपये
- मद्रास – ४८०० ते ५०००
- सापसोल मोठा – ५४०० ते ५६०० रुपये
- सापसोल मध्यम – ३२०० ते ३८०० रुपये
- पालकोल – ३२०० ते ३४०० रुपये