Kunal Kamra Updates : कुणाल कामराच्या अडचणीत वाढ, तीन नवे FIR दाखल; मुंबई पोलीस अटक करणार?

मद्रास उच्च न्यायालयाने कुणाल कामरा याचा अटकपूर्व अंतरिम जामीन मंजूर केला असून त्याला सात एप्रिलपर्यंत दिलासा मिळाला आहे. मात्र, आता मुंबईत त्याच्याविरोधात तीन नवे गुन्हे दाखल झाले आहेत. मुंबई पोलिस या गुन्ह्यांप्रकरणी त्याला अटक करू शकतात. मद्रास उच्च न्यायालयाचा आदेश या तीन नव्या एफआरआरवर लागू होणार नाही.

शिवसेना (यूबीटी) खासदार संजय राऊत म्हणाले, देवेंद्र फडणवीस यांच्या मंत्रिमंडळातील मंत्री कुणाल कामराला धमकावत आहेत, त्यामुळे कुणालच्या जीवाला धोका निर्माण झाला आहे. काहींनी त्याला गोळ्या घालून ठार करण्याची, फासावर टकवण्याची धमकी दिली आहे.

कुणाल कामरा याला यापूर्वी देखील समन्स बजावण्यात आलं होतं. तेव्हा त्याने सात दिवसांचा अवधी मागितला होता. आता त्याला दुसऱ्यांदा समन्स धाडण्यात आलं आहे.

वादात अडकलेल्या कुणाल कामराचा बचाव करण्यासाठी जन सुराज पार्टीचे संस्थापक व राजकीय रणनितीकार प्रशांत किशोर हे पुढे सरसावले आहेत. ते म्हणाले, कुणाल माझा मित्र आहे. तो देशावर प्रेम करतो. त्याची शब्दांची निवड चुकीची असू शकते मात्र त्याचा हेतू वाईट नव्हता.

मद्रास उच्च न्यायालयाने कुणाल कामरा याचा जामीन मंजूर केला आहे. यावेळी कामराच्या वकिलांनी उच्च न्यायालयाला सांगितलं होतं की, त्याला (कुणाल कामरा) ५०० हून अधिक धमक्यांचे फोन आले आहेत. धमक्या देणारे त्याला म्हणतात की ते ‘शिवसेना स्टाईलने त्याला धडा शिकवतील’. ‘शिवसेना स्टाईल’ म्हणजे काय हे सर्वांना माहिती आहे… हॉटेलमध्ये तोडफोड करणाऱ्यांवर कोणतीही गंभीर कारवाई झाली नाही, त्यांना जामिनावर सोडण्यात आलं आहे. अशाच प्रकारचा धोका मलाही आहे. मी नेहमीच सांगत आलो आहे की माझा संविधानावर विश्वास आहे,”