जळगाव : धुळे–सोलापूर राष्ट्रीय महामार्गावरील औट्रम घाट हा राज्यातील सर्वात अवघड आणि धोकादायक घाट मानला जातो. गेल्या अनेक वर्षांपासून या घाटातून प्रवास करणाऱ्या वाहनचालकांना सततचे अपघात, वाहतूक कोंडी आणि वेळेच्या अपव्ययाचा सामना करावा लागत होता. मात्र, आता या घाटातील प्रवास अधिक सुरक्षित आणि सुलभ होऊ शकणार आहे.

केंद्र सरकारने ५.५० किलोमीटर लांबीच्या अत्याधुनिक बोगद्याच्या बांधकामास मंजुरी दिली आहे. या महत्त्वाकांक्षी प्रकल्पावर सुमारे २,४३५ कोटींचा खर्च होणार असून, टेलवाडी ते बोधरे या सुमारे १५ किलोमीटरच्या टप्प्यात हा बोगदा उभारला जाणार आहे. या बोगद्यामुळे संभाजीनगर–पुणे दरम्यानच्या प्रवासाची वेळ मोठ्या प्रमाणात कमी होईल. तसेच अपघातांचे प्रमाण लक्षणीय घटेल.

हा प्रकल्प महाराष्ट्राच्या विकासातील एक ऐतिहासिक टप्पा ठरणार आहे. औट्रम घाटात आतापर्यंत अनेक अपघात झाले आहेत. त्यामुळे अनेकांवर जीव गमावण्याची वेळ आली आहे. याशिवाय, सकाळपासून रात्री उशिरापर्यंत होणाऱ्या वाहतूक कोंडीमुळे नागरिकांना प्रचंड त्रास सहन करावा लागला आहे. त्यामुळे या मार्गावर घाटाऐवजी सुरक्षित बोगदा उभारण्यात यावा, अशी मागणी नागरिकांकडून केली जात होती.

हेही वाचा

त्या अनुषंगाने केंद्र सरकारकडे वेगवेगळ्या स्तरावर पाठपुरावा केला गेला होता. अखेर केंद्र सरकारने या महत्वाकांक्षी प्रकल्पाला एकदाची मंजुरी दिली आहे. हा निर्णय महाराष्ट्राच्या विकास प्रवासातील ऐतिहासिक टप्पा ठरेल, असा विश्वास खासदार स्मिता वाघ यांनी व्यक्त केला आहे. पंतप्रधान नरेंद्र मोदी, केंद्रीय रस्ते वाहतूक मंत्री नितीन गडकरी आणि महाराष्ट्राचे मुख्यमंत्री देवेंद्र फडणवीस यांच्या दूरदृष्टीमुळे राज्यातील रस्त्यांचे आधुनिकीकरण वेगाने सुरू आहे.

औट्रम घाटातील बोगद्यासाठी माजी केंद्रीय मंत्री रावसाहेब दानवे तसेच भागवत कराड, राज्याचे जलसंपदा मंत्री गिरीश महाजन, चाळीसगावचे आमदार मंगेश चव्हाण यांनीही सातत्याने पाठपुरावा केला होता. औट्रम घाटातील बोगदा आकारास आल्यानंतर अवजड व हलक्या वाहनांची इंधन तसेच वेळेची बचत होईल. सततच्या अपघातांमध्ये घट होऊन पर्यावरणावरील ताण कमी होऊ शकेल, असाही दावा खासदार वाघ यांनी केला आहे.

असा असेल औट्रम घाटातील बोगदा

● एकूण लांबी : ५.५० किलोमीटर
● रस्त्याचा विस्तार : टेलवाडी ते बोधरे १५ किलोमीटर
● एकूण प्रकल्प खर्च : २,४३५ कोटी रूपये
● वाहन वेग : ताशी १०० किलोमीटरपर्यंत
● रचना : डबल ट्यूब स्ट्रक्चर, अत्याधुनिक वायुवीजन, आपत्कालीन बाहेर पडण्याचे मार्ग
● सुरक्षा सुविधा : फायर सिस्टम, डिजिटल सेन्सर, सीसीटीव्ही, वाहन नियंत्रण केंद्र