Navi Mumbai International Airport Inauguration Highlights: पंतप्रधान मोदींनी दिबा पाटील यांचा केला उल्लेख; म्हणाले, “त्यांचे काम…”

Navi Mumbai International Airport Inauguration 2025: नवी मुंबईच्या प्रवेशद्वारावर जड वाहने अडवली; वाहतूक पोलिसांची मोठी कसरत …वाचा सविस्तर

शशांक यांनी आपल्या इंस्टाग्राम स्टोरीवर नवी मुंबई विमानतळाचे एक सुंदर छायाचित्र शेअर केले आहे. परंतु त्यासोबत त्यांनी लिहिलेल्या काही ओळींनी नेटिझन्सचे लक्ष वेधले आहे. …सविस्तर बातमी

काँग्रेसवर टीका करताना पंतप्रधान मोदी पुढे म्हणाले, आमच्यासाठी देश आणि देशातील लोकांच्या सुरक्षेपेक्षा मोठे काही नाही. आजचा भारत दमदार प्रत्युत्तर देतो. आजचा भारत घरात घुसून मारतो. हे जगाने ऑपरेशन सिंदूरच्या वेळेला पाहिले.

काँग्रेसवर टीका करताना पंतप्रधान मोदी पुढे म्हणाले, विदेशी दबावाच्या खाली कोण आले? कुणी मुंबई आणि देशाच्या भावनेशी खेळ केला, हे काँग्रेसला सांगावे लागेल. देशाला हे जाणून घेण्याचा हक्क आहे. काँग्रेसच्या कमजोरीमुळे दहशतवादाला बळ मिळाले. देशाची सुरक्षा कमजोर झाली, ज्याची किंमत देशाला पुन्हा पुन्हा अनेकांचे जीव गमावून मोजावी लागली.

पंतप्रधान नरेंद्र मोदी म्हणाले, “काँग्रेसचे ज्येष्ठ नेते, जे देशाचे माजी गृहमंत्री राहिले आहेत. त्यांनी नुकतेच एका मुलाखतीत सांगितले की, मुंबईवरील हल्ल्यानंतर आमचे सैन्य पाकिस्तानवर हल्ला करण्यास तयार होते. संपूर्ण देशही हीच मागणी करत होता. पण काँग्रेसच्या नेत्याने सांगितल्यानुसार, दुसऱ्या देशाच्या दबावाखाली काँग्रेस सरकारने भारतीय सैन्याला पाकिस्तानवर हल्ला करण्यापासून रोखले.”

मुंबई भारताची आर्थिक राजधानी आहेच. त्याशिवाय सर्वात वायब्रंट शहर आहे. त्यामुळेच २००८ साली इथे दहशतवादी हल्ला झाला. पण तेव्हाच्या काँग्रेस सरकारने दहशतवादासमोर गुडघे टेकण्याचा संदेश दिला, अशी टीका पंतप्रधान नरेंद्र मोदी यांनी केली.

मुंबईच्या मेट्रो प्रकल्पाचे उद्घाटन मी केले होते. पण त्यानंतर काही काळासाठी वेगळे सरकार आले. त्यांनी ते काम थांबवले. त्यांना सत्ता मिळाली. पण देशाला हजारो कोटींचे नुकसान झाले. मुंबईकरांना असुविधा झाली. आता मुंबई मेट्रोचे काम पूर्ण झाले आहे. मुंबईत एका एका मिनिटाचे महत्त्व आहे. तिथे मुंबईकरांना या प्रकल्पासाठी चार ते पाच वर्षांची वाट पाहावी लागली, हे कोणत्याही पापापेक्षा कमी नाही, अशा शब्दांत पंतप्रधान नरेंद्र मोदींनी ठाकरे सरकारच्या काळावर टीका केली.

आम्ही अशा वातावरणात वाढलो आहोत, जिथे राष्ट्रनीती हाच राजनितीचा आधार असतो. आम्ही यासाठी विकास प्रकल्पांना अधिक महत्त्व देत आलो आहोत, असे पंतप्रधान नरेंद्र मोदी म्हणाले.

भारताकडून १००० विमानांची ऑर्डर दिली आहे, असे विधान पंतप्रधान नरेंद्र मोदी यांनी केले. ते म्हणाले, इतक्या मोठ्या प्रमाणात विमाने आयात केल्यामुळे वैमानिक, केबिन क्रू, ग्राऊंड वर्कर यांच्यासाठी रोजगाराच्या संधी वाढतील. विमाने वाढली तर त्याच्या देखभालीसाठी तंत्रज्ञ लागतील. हे तंत्रज्ञान विकसित करण्याचा आपला प्रयत्न आहे.

पंतप्रधान नरेंद्र मोदी भाषणात म्हणाले, २०१४ साली मी जेव्हा पंतप्रधान झालो, तेव्हा माझे स्वप्न होते की, हवाई चप्पल घालणारा सामान्य माणूसही हवाई प्रवास करू शकेल. यासाठी मी १० वर्षात अनेक विमानतळांना परवानग्या दिल्या. २०१४ साली देशात ७४ विमानतळ होते. त्याची संख्या वाढून आता १६० एवढी झाली आहे.

नवी मुंबई आंतरराष्ट्रीय विमानतळाला लोकनेते दिबा पाटील यांचे नाव देण्याची मागणी होत असताना पंतप्रधान नरेंद्र मोदी यांनी आपल्या भाषणात त्यांचा उल्लेख केला. ते म्हणाले, दिबा पाटिल यांचे काम आपल्या सर्वांना प्रेरणा देणारे आहे.

पंतप्रधान नरेंद्र मोदी यांच्या हस्ते नवी मुंबई आंतरराष्ट्रीय विमानतळाचे उद्घाटन होत आहे. उद्घाटनाचे भाषण करत असताना ते म्हणाले, विजयादशमी झाली, कोजागिरीही झाली. आता दहा दिवसांनी येणाऱ्या दिवाळीच्या तुम्हा सर्वांना आधीच शुभेच्छा देतो.

अशी मराठीत सुरुवात करत पंतप्रधान मोदींनी सर्वांना दिवाळीच्या शुभेच्छा दिल्या.

पंतप्रधान नरेंद्र मोदी यांनी पालघरच्या वाढवण येथे बंदर प्रकल्प दिला आहे. काही वर्षांनी येथे ऑफशोर विमानतळही बांधले जाणार आहे. नवी मुबंई ही तिसरी मुंबई आणि वाढवण ही चौथी मुंबई होईल, असेही मुख्यमंत्री देवेंद्र फडणवीस यांनी सांगितले.

मुंबईत देशातील सर्वात मोठी ४० किमी अंतर असलेली जमिनीखालील मेट्रो महायुती सरकारच्या काळात तयार करण्यात आली आहे. या प्रकल्पात अनेक अडथळे निर्माण झाले. मात्र मोदी सरकारमुळे ही सर्व आव्हाने पार करण्यात आले, असेही मुख्यमंत्री फडणवीस यांनी सांगितले.

नवी मुंबई आंतरराष्ट्रीय विमानतळ हा महाराष्ट्राचा जीडीपी १ टक्क्यांनी वाढविण्याची क्षमता ठेवतो, असेही उद्गार मुख्यमंत्री फडणवीस यांनी यावेळी काढले.

नवी मुंबई आंतरराष्ट्रीय विमानतळ हा नव्या भारताचे प्रतीक आहे. या विमानतळाची संकल्पना १९९० च्या दशकातील होती. मात्र याचे काम वेगाने पुढे जात नव्हते. पंतप्रधान नरेंद्र मोदी यांनी देशाची धुरा हाती घेतल्यानंतर एका बैठकीत निर्णय घेतला ८ ना-हरकत प्रमाणपत्र दिले. ९ कोटी प्रवाशी हाताळणारा विशाल विमानतळ येथे बांधण्यात आले आहे, असे मुख्यमंत्री देवेंद्र फडणवीस यांनी सांगितले.

भूमिपूत्रांच्या हक्काकरिता ज्यांनी लढा उभारला त्या लोकनेते दिबा पाटील यांच्या स्मृतींना उजाळा देतो, असे सांगून मुख्यमंत्री देवेंद्र फडणवीस यांनी आपल्या भाषणाची सुरुवात केली.

“महायुती सरकारच्या काळात मुख्यमंत्री देवेंद्र फडणवीस यांच्या नेतृत्वाखाली अनेक प्रकल्पांची सुरुवात करण्यात आली. मात्र त्यानंतर आलेल्या मविआ सरकारने सर्व प्रकल्पांना स्थगिती दिली. त्यानंतर २०२२ साली आलेल्या आपल्या सरकारने सर्व स्थगिती उठवून लावल्या आणि प्रकल्पांना पुन्हा गती दिली”, असे सांगून उपमुख्यमंत्री एकनाथ शिंदे यांनी मविआवर टीका केली.

उपमुख्यमंत्री एकनाथ शिंदे पुढे म्हणाले, “नवी मुंबई विमानतळावरून फक्त विमानच उड्डाण घेणार नाहीत तर पंतप्रधान नरेंद्र मोदी यांच्या आत्मनिर्भर भारताच्या स्वप्नांचेही उड्डाण होणार आहे. मोदींनी २०१४ साली जेव्हा पंतप्रधानपदाची धुरा सांभाळली तेव्हा देशात ७४ विमानतळ होते, मागच्या १० वर्षात ही संख्या वाढून दुप्पट झाली आहे. २०३० पर्यंत तिप्पट म्हणजे २२० करण्याचा मोदींचा निर्धार आहे.”

उपमुख्यमंत्री एकनाथ शिंदे यांनी आपल्या भाषणात म्हटले की, आठ वर्षांपूर्वी पंतप्रधान मोदींच्या हस्ते भूमिपूजन झाले होते, त्याचे आज लोकार्पण होत आहे. मोदींचा हात लागतो त्याचे सोने होते, हे आपण पाहतो. २०१४ मध्ये मोदींनी जो टेकऑफ केला तो भारताला महासत्ता करण्यासाठीच. उड्डाण म्हटले की, आम्हाला पंतप्रधान मोदी आठवतात.

नवी मुंबई आंतरराष्ट्रीय विमानतळ उद्घाटन प्रसंगी उपमुख्यमंत्री अजित पवार यांनी आपल्या भाषणात शेरोशायरी करत पंतप्रधान नरेंद्र मोदी आणि महायुती सरकारकडून होणाऱ्या विकासकामांची प्रशंसा केली. ते म्हणाले…

आँखे में कई ख्वाब बाकी है

दिल में कई हसरतें बाकी है

मैं कैसे थक जाऊँ

अभी कई मंजिलें बाकी है…

बुधवारी पंतप्रधान नरेंद्र मोदी यांनी नवी मुंबई आंतरराष्ट्रीय विमानतळाचे उद्घाटन केले. अडाणी समूहाने सार्वजनिक-खाजगी भागीदारी (PPP) मॉडेल अंतर्गत हे नवीन ग्रीनफिल्ड विमानतळ बांधले आहे. …वाचा सविस्तर

नवी मुंबई आंतरराष्ट्रीय विमानतळाचा प्रकल्प सोपा नव्हता. अनेक अडथळे येऊनही विमानतळाचा प्रकल्प यशस्वी झाला आहे. यामुळे नवी मुंबईच्या स्थानिक भूमिपूत्रांचा विकास होणार आहे, अशी भावना उपमुख्यमंत्री अजित पवार यांनी व्यक्त केली.

नवी मुंबई आंतरराष्ट्रीय विमानतळाच्या पहिल्या टप्प्याचा प्रकल्प खर्च १९,६५० कोटी रुपये असल्याचे सांगितले जाते. पंतप्रधान नरेंद्र मोदी यांनी उद्घाटन केल्यानंतर या प्रकल्पाची संबंधित अधिकाऱ्यांकडून माहिती घेतली.

See more

#WATCH | Navi Mumbai, Maharashtra | Prime Minister Narendra Modi inaugurates Phase 1 of the Navi Mumbai International Airport, built at a cost of around Rs 19,650 crore.

(Source: DD News) pic.twitter.com/ff3z7MvhsH

— ANI (@ANI) October 8, 2025

पंतप्रधान नरेंद्र मोदी यांच्या हस्ते नवी मुंबईतील आंतरराष्ट्रीय विमानतळाचे उद्घाटन करण्यात येत आहे.

See more

#WATCH | Navi Mumbai, Maharashtra | Prime Minister Narendra Modi inaugurates Phase 1 of the Navi Mumbai International Airport, built at a cost of around Rs 19,650 crore.

(Source: DD News) pic.twitter.com/6kSxFSHNgB

— ANI (@ANI) October 8, 2025

नवी मुंबई आंतरराष्ट्रीय विमानतळ लिमिटेड आणि सिडकोच्या संयुक्त भागीदारीत हा प्रकल्प उभा करण्यात आला आहे. या विमानतळाचे उद्घाटन पंतप्रधान नरेंद्र मोदी यांच्या हस्ते करण्यात येत आहे. …सविस्तर वाचा

नवी मुंबई आंतरराष्ट्रीय विमानतळाला दिवंगत लोकनेते दि. बा. पाटील यांचे नाव मिळावे, यासाठी गेली तीन वर्षे पनवेल आणि उरण परिसरातील प्रकल्पग्रस्त झटत आहेत. …सविस्तर वाचा

नवी मुंबई आंतरराष्ट्रीय विमानतळाचे थोड्या वेळातच उदघाटन होणार आहे. तत्पूर्वी पंतप्रधान नरेंद्र मोदी यांनी विमानतळाचा एक व्हिडीओ शेअर केला आहे. तसेच मी उदघाटनाच्या कार्यक्रमासाठी निघालो असल्याचेही ते म्हणाले.

See more

On the way to Navi Mumbai to take part in the programme marking the inauguration of Phase-1 of the Navi Mumbai International Airport. With this, the Mumbai Metropolitan Region will get its second major international airport, thus boosting commerce and connectivity. The final… pic.twitter.com/t6v82O6Een

— Narendra Modi (@narendramodi) October 8, 2025

नवी मुंबई आंतरराष्ट्रीय विमानतळाचे उद्घाटन बुधवारी (आज) दुपारी तीन वाजल्यानंतर पंतप्रधान नरेंद्र मोदी यांच्या हस्ते होणार आहे. …सविस्तर वाचा

Navi Mumbai Airport Inauguration 2025: विमानतळाला ठाणे, रायगड, पालघर पट्ट्यातील भूमिपुत्रांचे नेतेदिवंगत दि. बा. पाटील यांचे नाव देण्यास पंतप्रधान नरेंद्र मोदी सकारात्मक असल्याचे मुख्यमंत्री देवेंद्र फडणवीस यांनी स्पष्ट केल्याने ‘दिबां’च्या नावाचीघोषणा औपचारिकता उरली आहे …वाचा सविस्तर