नवी दिल्ली: शिवसेनेचे आमदार रमेश लटके यांच्या निधनामुळे रिक्त झालेल्या अंधेरी-पूर्व विधानसभेच्या मतदारसंघाची (१६६) पोटनिवडणूक ३ नोव्हेंबर रोजी होईल. केंद्रीय निवडणूक आयोगाने महाराष्ट्रासह ६ राज्यांतील विधानसभेच्या ७ रिक्त जागांसाठी पोटनिवडणुकांचा कार्यक्रम सोमवारी जाहीर केला. उमेदवारी अर्ज भरण्याची १४ ऑक्टोबर हा अखेरचा दिवस आहे. अंधेरी-पूर्व विधानसभा मतदारसंघासह बिहारमधील दोन, तर हरियाणा, तेलंगणा, उत्तर प्रदेश आणि ओदिशा राज्यांतील प्रत्येकी एक अशा ७ जागांसाठी ३ नोव्हेंबर रोजी मतदान होणार असून ६ नोव्हेंबरला निकाल जाहीर होईल. या निवडणुकांसाठी ७ ऑक्टोबर रोजी अधिसूचना जारी होईल. १४ ऑक्टोबर ही अर्ज करण्याची अंतिम तारीख असून १५ नोव्हेंबर रोजी अर्जाची छाननी केली जाईल. १७ ऑक्टोबपर्यंत अर्ज मागे घेता येतील. ३ नोव्हेंबर रोजी मतदान होणार असून ६ नोव्हेंबर रोजी मतमोजणी होईल.
