जागतिक क्रमवारीत अव्वल स्थानी असलेल्या अ‍ॅश्ले बार्टीने इतिहास रचला आहे. तिने पहिल्यांदाच ऑस्ट्रेलियन ओपनचे विजेतेपद पटकावले. तिने आज शनिवारी महिला एकेरीच्या विजेतेपदाच्या लढतीत अमेरिकेच्या डॅनिएल कॉलिन्सचा ६-३, ७-६ असा पराभव केला. हा सामना २७ मिनिटांत संपवला. विशेष म्हणजे बार्टीने संपूर्ण स्पर्धेत एकही सेट गमावला नाही.

या बातमीसह सर्व प्रीमियम कंटेंट वाचण्यासाठी साइन-इन करा

बार्टीने २८ वर्षीय कॉलिन्सवर सुरुवातीपासूनच वर्चस्व राखले आणि पहिला सेट ६-३ असा सहज जिंकला. यानंतर कॉलिन्सने दुसऱ्या सेटमध्ये प्रतिकार करण्याचा प्रयत्न केला, पण बार्टीने हा सेट ७-६ असा जिंकून आपले तिसरे ग्रँडस्लॅम विजेतेपद पटकावले. बार्टीने यापूर्वी २०१९ मध्ये फ्रेंच ओपन आणि २०२१ मध्ये विम्बल्डन जिंकले होते. ऑस्ट्रेलियन ओपनमध्ये बार्टीचा विजय-पराजय रेकॉर्ड आता २४-८असा आहे. २०२२मध्ये तिने या स्पर्धेच्या उपांत्य फेरीत प्रवेश केला जेथे तिला अमेरिकन खेळाडू सोफिया केनिनने पराभूत केले.

हेही वाचा – IPL 2022 : मेगा ऑक्शनमध्ये नशीब आजमवणार भूतानचा खेळाडू; धोनीनं दिला ‘असा’ कानमंत्र!

४४ वर्षांनंतर हे विजेतेपद पटकावणारी बार्टी पहिली ऑस्ट्रेलियन खेळाडू ठरली आहे. यापूर्वी १९७८ मध्ये ख्रिस ओ’नीलने ऑस्ट्रेलियन ओपनचे विजेतेपद पटकावले होते.

टेनिस..क्रिकेट…पुन्हा टेनिस..!

अ‍ॅश्ले बार्टी ही क्रिकेटपटूही राहिली आहे. ब्रिस्बेन हीटसाठी तिने महिला बिग बॅश लीगमध्येही आपली चमक दाखवली होती. मात्र आता तिने टेनिसमध्ये आपला ठसा उमटवला. वयाच्या १५व्या वर्षापासून ती स्टार टेनिसपटू आहे आणि २०१३मध्ये विम्बल्डनमध्ये पदार्पण केले. २०१४मध्ये बार्टीने टेनिसमधून ब्रेक घेऊन क्रिकेट खेळण्याचा निर्णय घेतला. त्यावेळी ती फक्त १९ वर्षांची होती. तिने महिला बिग बॅश लीगमध्ये ब्रिस्बेन हीटसाठी ९ सामन्यांत ११.३३च्या सरासरीने ६८ धावा केल्या. यापूर्वी, ती वेस्टर्न सबडर्ब जिल्हा क्रिकेट क्लबकडून खेळली होती. बार्टीने २०१६मध्ये टेनिस क्षेत्रात परतण्याचा निर्णय घेतला.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Australian open ashleigh barty wins first melbourne title by beating danielle collins adn
First published on: 29-01-2022 at 16:25 IST