मिरा भाईंदरमध्ये अनधिकृत बोअरवेल; शहरातील भूजल पातळी खालावली

शहरात नैसर्गिक स्रोत असलेल्या पाण्याच्या ठिकाणी अनेकांनी बेकायदेशीरपणे बोरवेल तयार करण्यात आल्या आहेत. त्यातून भुजलातील पाणी मोठ्या प्रमाणात उपासले जात आहे. त्याचा परिणाम विहीरी आणि तलावांवर होत असून त्यातील पाणी आटू लागले आहे. मिरा भाईंदर शहरात अनधिकृतपणे बोअरवेल तयार करून पाणी उपसणाऱ्यांची तक्रार अनेकांनी महापालिका दरबारीं दिली आहे. त्यानुसार महापालिकेने सर्वेक्षण करून एकूण ६४ अनधिकृतपणे पाणी उपसा करणार्‍यांची यादी तयार केली आहे. असून कारवाईच्या दुष्टीने पावले उचलणार असल्याचा इशारा व्यवसायिकांना दिला आहे. भूजलातील नैसर्गिक स्रोतातून पाणी उपसणाऱ्यांवर कारवाई करण्याचे अधिकार जिल्हा उपविभागीय अधिकाऱ्यांकडे असतात. त्यामुळे ही यादी महापालिकेने प्रांत अधिकाऱ्यांकडे सोपावली आहे. त्यांच्याकडून कारवाईची प्रतीक्षा आहे.

कारवाईचे अधिकार देण्याची मागणी:-

नगरपरिषद प्रशासनाच्या जिल्हा सह आयुक्तांनी वरिष्ठ भूवैज्ञानिक, भूजल सर्वेक्षण व विकास यंत्रणा यांना अवैध भुजल पाणी उपशावर कारवाई करण्याचे निर्देश दिले होते.मात्र वरिष्ठ भूवैज्ञानिकांनी या कारवाईचे अधिकार महाराष्ट्र भुजल ( विकास व व्यवस्थापन) अधिनियम २००९ अंतर्गत कलम १७ मधील तरतुदीनुसार जिल्हा प्रांताधिकाऱ्यांना प्रदान केल्याचे स्पष्ट करण्यात आले आहे.यात जिल्हा प्राधिकार्‍याकडून भुजल पाणी स्रोताच्या वापराकरिता ना हरकत प्रमाणपत्र घेणे आवश्यक आहे.मात्र मिरा भाईंदर मधील खासगी पाणी स्त्रोताच्या मालकांकडून असे कोणतेही प्रमाणपत्र घेतले नसल्याची बाब आयुक्त राधा विनोद शर्मा यांच्या निदर्शनात आली आहे.त्यामुळे भुजल स्त्रोतातून पाणी उपसणाऱ्या व्यक्तीवर थेट कारवाई करण्याचे अधिकार देण्याची मागणी त्यांनी जिल्हाधीकारी अशोक शिंगारे यांच्याकडे केली आहे.

विहिरीच्या संख्येत घट

मिरा भाईंदर शहरात जवळपास सार्वजनिक व खासगी अशा मिळून जुन्या ५०५ विहिरी नोंद आहे.यात ११५ सार्वजनिक आणि ३९३ खासगी विहिरी आहेत.मात्र आता समोर आलेल्या सर्वेक्षात केवळ ५४ सार्वजनिक व २२ विहिरी शिल्लक राहिल्या असून इतर विहिरी बेपत्ता झाल्याची माहिती पर्यावरण प्रेमी कडून देण्यात आली आहे.