पुण्याचे रडगाणे सुरूच

पुणे वॉरियर्सच्या फलंदाजांनी घरच्या मैदानावर पुन्हा एकदा हाराकिरी केली. त्यामुळेच चेन्नई सुपर किंग्सने पुण्यावर ३७ धावांनी विजय मिळवून १६ गुणांसह अव्वल स्थान पटकावले. विजयासाठीच्या १६५ धावांच्या आव्हानाला सामोरे जाताना पुण्याला २० षटकांत ९ बाद १२७ धावा करता आल्या.
पुण्याच्या रॉबिन उथप्पा व आरोन फिन्च यांनी पहिल्या दोन षटकांत २६ धावा वसूल करीत चांगली सुरुवात केली. मात्र तिसऱ्या षटकांत मोहित शर्मा याने फिन्च (१५) व टी. सुमन (०) यांना बाद करत पुण्याच्या डावाला खिंडार पाडले. पाठोपाठ उथप्पा (१०) व युवराज सिंग (५) हे तंबूत परतल्यानंतर पुण्याची ४.५ षटकांत ४ बाद ४६ अशी दयनीय स्थिती झाली.
ल्युक राईटपाठोपाठ अभिषेक नायर धावबाद झाल्यानंतर केन रिचर्डसन व स्टीव्हन स्मिथ यांनी ३१ धावांची भागीदारी करत डाव सावरण्याचा प्रयत्न केला, मात्र स्मिथ हा रवींद्र जडेजाच्या गोलंदाजीवर बाद झाला. त्याने ३५ धावा केल्या. भुवनेश्वर कुमारने जडेजास एकाच षटकात चौकार व षटकार ठोकून प्रेक्षकांचे मनोरंजन केले. भुवनेश्वर (नाबाद २५) व केन रिचर्डसन (२६) यांचे प्रयत्नही संघास विजय मिळविण्यासाठी कमी पडले.
तत्पूर्वी, सुरेश रैनाचे (नाबाद ६३) दमदार अर्धशतक तसेच कर्णधार महेंद्रसिंह धोनी (नाबाद ४५) व एस. बद्रीनाथ (३४) यांच्या आक्रमक फटकेबाजीमुळेच चेन्नई सुपर किंग्सने पुणे वॉरियर्सपुढे १६५ धावांचे लक्ष्य ठेवले. चेन्नईने भरवशाचा फलंदाज मायकेल हसीची विकेट लवकर गमावली. एक षटकार व एक चौकारासह चांगली सुरुवात करणारा वृद्धिमान साहा याला पायचीत पकडत राहुल शर्माने चेन्नईला दुसरा धक्का दिला. त्यानंतर बद्रीनाथ व सुरेश रैना यांनी संघाचा डाव सावरला. या जोडीने तिसऱ्या विकेटसाठी ७५ धावांची भागीदारी रचली. बद्रीनाथने तीन चौकारांसह ३४ धावा जमविल्या. धोनी मैदानात उतरल्यावर चेन्नईची ‘सुपर-एक्सप्रेस’ सुरू झाली. त्याने रैनाच्या साथीत केवळ २७ चेंडूंमध्ये ६१ धावांची अभेद्य भागीदारी केली. त्यामध्ये धोनीचा ४५ धावांचा वाटा होता. त्याने केवळ १६ चेंडूंमध्ये ४५ धावा करताना तीन षटकार व चार चौकार अशी टोलेबाजी केली. रैना याने नाबाद ६३ धावा करताना पाच चौकार व एक षटकार ठोकला. शेवटच्या पाच षटकांत चेन्नईने ६२ धावा वसूल केल्या.