“चीनने तैवानवर आक्रमण केल्यास अमेरिका…”; जपान दौऱ्यात बायडेन यांनी दिलेल्या इशाऱ्यामुळे संघर्षाला तोंड फुटण्याची शक्यता

अमेरिका आणि चीनमध्ये तैवानच्या मुद्द्यावरुन सुरु असणारा वाद पुन्हा चिघळण्याची चिन्हं दिसत आहेत. रशियाच्या युक्रेनवरील आक्रमणानंतर तैवानचे संरक्षण करण्याचे ओझे ‘आणखी मोठे’ असल्याचं अमेरिकेचे अध्यक्ष जो बायडेन यांनी म्हटलंय. टोक्योमध्ये ते क्वाड परिषदेनिमित्त आयोजित पत्रकार परिषदेत बोलत होते. तसेच चीनने तैवानवर आक्रमण केल्यास अमेरिका लष्करी हस्तक्षेप करेल, असा इशारा बायडेन यांनी दिलाय. तैवान सरकारच्या समर्थनार्थ अमेरिकेच्या कुठल्याही अध्यक्षाने गेल्या दशकभरात केलेले हे सर्वात जोरदार वक्तव्य होते. चीनने आक्रमण केल्यास तैवानच्या संरक्षणासाठी लष्कर आणण्यास तुम्ही इच्छुक आहात काय, असा प्रश्न बायडेन यांना पत्रकार परिषदेत विचारण्यात आला होता. बायडेन यांनी या प्रश्नावर उत्तर देताना ‘होय’ असं सांगितलं. ‘आम्ही तसे वचन दिले आहे,’ असे ते म्हणाले. तैवानशी कुठलाही संरक्षणविषयक करार नसलेला अमेरिका सहसा तैवानला अशा प्रकारची सुरक्षेची स्पष्ट हमी देणे टाळतो. मात्र आता अमेरिकेने चीनला थेट इशारा दिलाय. चीनने आक्रमण केल्यास आपण कुठवर पाऊल पुढे टाकू याबाबत ‘व्यूहात्मक संदिग्धतेचे’ धोरण अमेरिकेने आजवर बाळगले आहे. मागील बऱ्याच काळापासून तैनाव आणि चीनमध्ये संघर्ष सुरु आहे. अशातच आता बायडेन यांच्या या वक्तव्यामुळे अमेरिका आणि चीनमध्ये नवीन वादाची ठिणगी पडण्याची शक्यात आहे. चीन हा तैवानला आपलाच भूभाग मानतो आणि अनेकदा चीनने अशापद्धतीचा दावा केला आहे. त्यामुळे आता या वक्तव्यावर चीन अमेरिकेला काय उत्तर देतो याकडे सर्वांचं लक्ष लागून राहिलेलं आहे. (फोटो सौजन्य : रॉयटर्सवरुन साभार)