तीनदा लँडिंग ‘फेल’; रडायला लागले SpiceJet चे प्रवासी, तासभर हवेतच फेऱ्या मारल्यानंतर विमान…

1/10

अहमदाबादहून जैसलमेरला जाणाऱ्या स्पाइसजेटच्या विमानातील प्रवाशांना कधी कल्पनाही केली नसेल असा विमान प्रवासाचा अनुभव आला. वैमानिकाला विमान धावपट्टीवर उतरवण्यात अपयश आलं, तीन वेळेस प्रयत्न करुनही पायलटला सुरक्षितपणे विमानाचं लँडिंग करता आलं नाही. त्यामुळे जवळपास एक तास विमान हवेतच फिरत होतं. घटनेमुळे विमानातील प्रवाशांमध्ये इतकं भीतीचं वातावरण पसरलं की काही प्रवासी तर अक्षरशः रडायला लागले.

2/10

झी न्यूजच्या वृत्तानुसार, शनिवारी (दि.२०) ही घटना घडली. दुपारी 12 वाजून 5 मिनिटांनी स्पाइसजेटच्या विमान क्रमांक एसजी 3012 ने अहमदाबादच्या विमानतळावरुन जैसलमेरच्या दिशेला उड्डाण घेतलं होतं.

3/10

जवळपास एका तासानंतर साधारण दुपारी एक वाजेच्या सुमारास हे विमान जैसलमेरच्या विमानतळाजवळ पोहोचलं.

4/10

जैसलमेरच्या विमानतळाजवळ पोहोचल्यावर वैमानिकाने विमान सुरक्षित उतरवण्याचा प्रयत्न केला, पण तो अयशस्वी ठरला.

5/10

त्यानंतर विमानाने पुन्हा आकाशात झेप घेतली आणि दोन विविध दिशेने विमान धावपट्टीवर उतरवण्याचा प्रयत्न करण्यात आला, पण पुन्हा तांत्रिक कारणांमुळे विमानाचं लँडिंग होऊ शकलं नाही.

6/10

त्यामुळे विमान जवळपास एक तास आकाशातच फेऱ्या मारत होतं. यामुळे विमानातील प्रवाशांमध्ये इतकं भीतीचं वातावरण पसरलं होतं की काही प्रवासी तर अक्षरशः रडायला लागले.

7/10

नंतर दुपारी दोन वाजेच्या सुमारास वैमानिकाने विमान पुन्हा अहमदाबादच्या दिशेने फिरवलं, आणि दुपारी २ वाजून ४० मिनिटांनी विमान पुन्हा अहमबदाबादला पोहोचलं.

8/10

जवळपास दोन तासांनी पुन्हा विमानाने जैसलमेरच्या दिशेने उड्डाण घेतलं.

9/10

अखेर साधारण ५ वाजून १५ मिनिटांच्या सुमारास विमानाची जैसलमेर विमानतळाच्या धावपट्टीवर सुरक्षित लँडिंग झाली आणि प्रवाशांनी सुटकेचा निःश्वास सोडला. या सर्व भयावह परिस्थितीत विमानाच्या पायलटनेही धैर्य सोडलं नाही.

10/10

"स्पाइसजेटच्या विमान क्रमांक एसजी 3012 ने अहमदाबादच्या विमानतळावरुन जैसलमेरसाठी उड्डाण घेतलं होतं. पण तांत्रिक कारणांमुळे वैमानिकाला विमान विमानतळाच्या धावपट्टीवर उतरवता आलं नाही. वैमानिकाने लँडिंगसाठी एकदा साउथ टू नॉर्थ आणि दोनदा नॉर्थ टू साउथ अशा विविध दिशांनी तीन वेळेस प्रयत्न केला. पण, विमान उतरवण्यात अपयश आलं यामुळे वैमानिकाने विमान पुन्हा आकाशात उडवलं", अशी माहिती विमानातील प्रवासी, जैसलमेरचे पर्यटन व्यावसायिक मयंक भाटिया यांनी दिली. जवळपास एक तास विमान हवेतच फिरत होतं त्यामुळे प्रवाशांमध्ये भीतीचं वातावरण निर्माण झालं होतं, विशेषतः विमानातील महिला प्रवासी जास्त घाबरले होते, असंही भाटिया यांनी सांगितलं. (सर्व संग्रहित छायाचित्रे )