पर्वती जलकेंद्रातील वीज पुरवठा अचानक खंडीत झाल्याने मध्यवर्ती भागासह उपनगरातील पाणीपुरवठा शुक्रवारी विस्कळीत झाला. सलग दुसऱ्या दिवशी शहराला नियमित स्वरुपात पाणीपुरवठा होऊ शकला नाही. महापालिकेच्या निष्क्रिय कारभाराचा फटका नागरिकांना बसला.

या बातमीसह सर्व प्रीमियम कंटेंट वाचण्यासाठी साइन-इन करा

वारजे जलकेंद्रात बिघाड झाल्याने गुरुवारी कोथरूड, कर्वेनगर, डेक्कन जिमखाना आणि शिवाजीनगर भागाचा पाणीपुरवठा गुरुवारी विस्कळीत झाला होता. त्यानंतर पर्वती जलकेंद्राचा वीजपुरवठा शुक्रवारी खंडीत झाल्याने  पेठा, शिवदर्शन, शिंदे हायस्कूल, तावरे कॉलनी, अरणेश्‍वर, संत नगर, तावरे चौक, ट्रेजर पार्क, सहकारनगर या भागाला पाणी पुरवठा करणाऱ्या टाकीत आवश्‍यक पाणी जमा होऊ शकले नाही. त्यामुळे या भागात आज पाणी पुरवठा होऊ शकला नाही. दरम्यान, वारजे येथे पुन्हा दीड तास वीज पुरवठा खंडित झाल्याने कोथरूड, शिवाजीनगर, मॉडेल कॉलनी, येरवडा यासह इतर भागात उशिरा पाणीपुरवठा करण्यात आला. पर्वती जलकेंद्रातील तांत्रिक अडचणींमुळे पेठांसह इतर भागात पाणी पुरवठा विस्कळित झाला होता. दुपारनंतर पाणी पुरवठा सुरळीत करण्यात आल्याचा दावा पाणीपुरवठा विभागाचे प्रमुख अनिरुद्ध पावसकर यांनी केला. महिन्याती किमान एकदा देखभाल दुरुस्तीच्या अत्यावश्यक कामांसाठी पाणीपुरवठा बंद ठेवण्यात येतो. मात्र त्यानंतरही तांत्रिक कारणांमुळे पाणीपुरवठा विस्कळीत कसा होतो, अशी विचारणा नागरिकांकडून करण्यात  येत आहे.

Pune News (पुणे न्यूज), Maharashtra News, Marathi News (मराठीतील बातम्या) वाचण्यासाठी डाउनलोड करा लोकसत्ताचं Marathi News App.
Web Title: Water supply disrupted due to interruption of power supply in parvati water purification plant pune print news zws
First published on: 30-09-2022 at 21:49 IST